MAZMUR 76 - Alkitab Singog In Mongondow Masa In Tanaa

Ki Allah, Hakim in bayongan bangusa

¹ Kon i itoi in mododondong. Takin ito-itog kecapi. Mazmur i Asap. Dondong.

² Ki Allah in ponango-nangoian kon Yohuda; tangoi-Nea in noiwayadon kon Israel.

³ Yerusalem in pogogogaian-Nea; Tombuḷud in Sion in pogogutunan-Nea.

⁴ Kon tua irimumud-Nea in bayongan pakakat in parang, bayongan piot mopouḻi-uḻinag, kaḻeaw bo kedang.

⁵ Totuubí kon moḷantud in Iko, bo momulia, noiḻiubí kon buḷud mita dungkuḷmai.

⁶ Intau mita mobarani ain pinogagowan; mosia in noisiug bidon bo diádon mobangon bui. Tontara mita inta mongotorindog noinggamádon in ropotnea.

⁷ Bayongan in kabaḷo bo tumotakoinea noḷabú minatoi in guak-Mu, o Allah Yakub!

⁸ Totuubí kon motoyang in Iko! Aka tumorú in Iko, ki ine in mokoigon?

⁹ Nongkon ḷangit Iko moponiata in onu in sinantú-Mu; butá moondok bo kibio-biómai.

¹⁰ Kon tungkuḷ in Iko simindog sin monisigdon sin moposaḷamat kon intau inta dinorot kon dunia.

¹¹ Umpaka intau mita inta totok in moḻingá modayow kon ini-Mu, bo inta sinumorúpa in momaké in kaeng karong tomponuot nonogumatoi.

¹² Intompodaidon in dandimu kon i Tuhan Allahmu. Bayongan bangusa inta nogutun kon diugmai in modia kon sosumba kon i Allah inta kinoondok.

¹³ Sia in monginggamá kon ibog in pongawasa mita; datu mita angoian in ondok kon i-Nia.