MAZMUR 75 - Alkitab Singog In Mongondow Masa In Tanaa

Ki Allah in hakim inta totok in moḷantud

¹ Kon i itoi in mododondong. Podudui in dondong: Dika moyopú. Mazmur i Asap. Dondong.

² Kami in mosumba kon ini-Mu, o Allah, kami in mopoyaput in sukur kon ini-Mu bo mopotaau in oaidan-Mu inta mokotongaw.

³ Ki Allah in noguman, “Kon wakutu inta sinantú-Ku, Akuoi in mohakimbí koadilon.

⁴ Aka butá naa modandú takin bayongan mogogutunnea Akuoibí in noginrigon kon oiginea mita.”

⁵ Kon intau inta moambungangaḷ, akuoi in moguman sinbá dikadon mongambungangaḷ bui.

⁶ Bo kon intau moraat, sinbá dikadon dumodia. Dika yumunggagá andeka ḷumoḷatú in mongonguman.

⁷ Sin pohakiman in diábí mamangoi nongkon pomukaan andeka toyopan deemanbí doman nongkon utuan andeka toḷatan.

⁸ Táe ki Allahbí tontaní in mohakim, Sia in mopoompá kon tobatú bo mopoḷantud kon ibanea.

⁹ Torú i Tuhan naonda bo piala kon ḻima-Nea, piala tatua in binonuan in tubig in anggur inta mokoḷoḷangu. Ki Allah in nopobutak in bonunea, bayongan in intau moraat kon dunia musti monginum dapot in modait.

¹⁰ Táe akuoi in umuranbí mopotaau in Allah i Yakub, mopodondong in dodayow kon i-Nia.

¹¹ Putoḷan-Neabí in ropot in intau moraat, táe intau mopia in modugangbí moropot.