MAZMUR 74 - Alkitab Singog In Mongondow Masa In Tanaa

Sambayang kon koḷuatan in bangusa

¹ Dondong topotundú i Asap. O Allah, degá modapot in mononoi taḷaan-Mu in kami? Nongonu sin Iko in umuranbí tumorú kon umat-Mu tontaní?

² Toropdon in umat-Mu inta piniḻí-Mu nongkon dungkuḷmai, bangusa inta pinoḷuai-Mu sinbá mobaḻí kapunyaan-Mu. Toropdon in Tombuḷud in Sion, inta binaḻí-Mu pogogutunan-Mu.

³ Ritakaidon in tampat inta ain nobaḻí apug; bayongan inta kon Baḷoi-Mu ain irimumud in musung.

⁴ Musung-Mu mita in moromaḷú kon Baḷoi-Mu, bo mobangon kon bandera kinountungan kon tua.

⁵ Mosia in naonda bo mononaḷun kon kayu inta mopomambing in boḻiungnea, sin momupuḷ kon kayu mita kon kayuon.

⁶ Bayongan in kayu kinurig irimumud monia in boḻiung bo bobibil.

⁷ Mosia in noturub kon Baḷoi-Mu nodapot in nodait; bo noponajis in tampat pososumbaan kon ini-Mu.

⁸ Mosia in moibogbí mopotungkud kon inami komintan, bo moturub komintan kon tampat pooibadaan kon butá tanaa.

⁹ Nabi mita bo tomponuot mita inta mokoherang diádon koontongan bui, bo diádon tobatúmai in intau in nonotaau mongo dapot in toonu in nanaa.

¹⁰ Modapot in toonu, o Allah, musung in morebeg kon ini-Mu? Modapot degá in mononoi mosia in moningkuḻe kon tangoi-Mu?

¹¹ Nongonu sin Iko in diá bidon motuḷung kon inami? Nongonu sin pinomayá-Mubí mako in kami?

¹² Nongkon pinomangkoianpabímai Ikobí in ki datuku, o Allah, Ikobí inta noposaḷamat kon inami.

¹³ Pinongin ropot inta totok in motoyang binotak-Mu in dagat, bo noḷosi kon uḷu in naga mita in dagat.

¹⁴ Iko in nomutuk kon uḷu mita in Lewiatan bo binaḻí-Mu in sia kokaanon in mogogutun kon padang gurun.

¹⁵ Iko in nopoiḻig in bokaká bo ongkag; ongkag inta moḷoben iningkagan-Mu.

¹⁶ Ikobí in nomaḻí kon singgai bo doḷom, bo nonantú kon tampat in mata in singgai bo buḷan.

¹⁷ Iko in nonantú kon sigad mita in butá, momia kon sempo in poninggai bo sempo in pongonguyan.

¹⁸ Toropdon naonda in pinononingkuḻe in musung kon ini-Mu, o Tuhan, bangusa inta diá nonotaau kon ini-Mu nohojat kon tangoi-Mu.

¹⁹ Dika mopomayá mako in umat-Mu inta diádon mokopongonu moḷabú kon kawasa in musung inta moḻingá. Dikabí modapot in mononoi mokoḻiong kon ukur in umat-Mu inta kinatuḷa.

²⁰ Toropdon kaasí in dodandian inta pinomia-Mu takin inami, sin intau in nopoaid in inta motogat kon bayongan in tampat mosindip kon butá tanaa.

²¹ Dikadon kaasí pomayá mako in intau dinorot pokopooyáanmai, igumon mako intau mororiga bo nobogá in modayow kon ini-Mu.

²² Sindogdon o Allah, duḷuaidon in pelekara-Mu! Sin kinoouput in singgai Iko in singkuḻeon in intau mita inta diá mopirisaya kon ini-Mu.

²³ Dika koḻiongan in kokow in musung-Mu mita, dowawá in ḷawang-mu mita modugangdon moropot!