MAZMUR 73 - Alkitab Singog In Mongondow Masa In Tanaa

BUK INTOḶUNEA: MAZMUR 73–89 Kooadil i Tuhan

¹ Mazmur i Asap. Totuubí mopia in ki Allah kon umat-Nea, kon intau inta motuḻid in ginanea.

² Táe noḻiaidon in ginaku, pirisayaku in gogiódon bo moinggamá,

³ sin mointoi in akuoi kon intau inta mododia, kon dodai in akuoi mokoontong kon kauntungan in intau moraat.

⁴ Sin mosia in diábí nokorasa kon takit, awak monia in moropot bo mosehat.

⁵ Mosia in diábí nobaba kon susa, diábí kinoantugan in nahat ná intau ibanea.

⁶ Tuamai in mosia dumodia, bo umuran mogaid kon inta moromú.

⁷ Nongkon gina monia moiḷuai in moraat; mosia in tongábí tantú morai kon tomayá mita moraat.

⁸ Mosia in morebeg bo moposingo-singogmai, bo takin ḷoḷatú mosia in mogogondok bo mondorot.

⁹ Mosia in mohojat kon i Allah kon soroga, bo mongambungangaḷ kon intau mita kon dunia,

¹⁰ dá umat i Allah in mobui domandon kon i monia, bo mopirisaya kon singog monia.

¹¹ Guman monia, “Diábí kinotaauan i Allah, Ki Inta Totok in moḷantud diábí nomangaḻe.”

¹² Natuata in kaadaan in intau moraat; kobobiagnea in moodom, kapunyaannea in tantú modugang.

¹³ Diábí in mangaḻenea in akuoi moḷukad sinbá ginaku modarit; diábí in mangaḻenea in akuoi yumayú kon dosa.

¹⁴ Sin kinoouput in singgai akuoi koantugan in nahat; pomuḷoi in doḷo-doḷom akuoi rorigaan.

¹⁵ Aka kuma bo akuoi in moguman natua, yo akuoi in nonoḻikudon kon adímu mita.

¹⁶ Táe kon tungkuḷ in akuoi noḷongasi momangaḻe, tua in totokbí in mororigaku raion.

¹⁷ Imbuitnea sinumuot in akuoi kon Baḷoi i Tuhan, bo kinomangaḻeankudon in imbuit in intau moraat.

¹⁸ Pinotabá-Mu in mosia nongin daḷan inta morondog, bo pinomayá-Mu mako in mosia in moḷabú bo matoi.

¹⁹ Tongá kon bonu in tokokiap morimumud in mosia, totuubí motoyang in kopaḷutan monia.

²⁰ Naonda bo togoindop inta noinggamá kon tungkuḷ in doḷo-doḷom; kon dodai in Iko sinimindog, o Tuhan, yo noinggamádon in mosia.

²¹ Kon tungkuḷ in moyaat in ginaku bo naonda bo tura-turakon,

²² nobodok in akuoi bo diá momangaḻe, akuoi naa in naonda bo mahaḷuk kon tayowon-Mu.

²³ Táe akuoi in umuranbí kon diug-Mu, kinadaian-Mu in ḻimaku koḷanan.

²⁴ Kinapit-Mu in akuoi in tonggina, bo sinarima-Mu in akuoi takin horomat kon singgai moiduduimai.

²⁵ Ki inebí in kapunyaanku kon soroga koḻikudbí in Iko? Tongábí Iko diábí in ibanea mako in koibogku in kon butá.

²⁶ Umpaka dimukud bo awakku in moḻemédon, Ikobí in ropotku, o Allah; Ikobí in kapunyaanku modapot in mononoi.

²⁷ Intau inta monaḷámai kon ini-Mu in moboditobí, Iyopú-Mu in intau inta diá motoḷutui kon ini-Mu.

²⁸ Táe aka kon inakó yo totuubí kon mopia in kon diug i Allah, Tuhan Allah in baḻíonku pononiunganku, sinbá motaau in akuoi mopotaa-taau mako in bayongan inta inaidan-Nea.