MAZMUR 72 - Alkitab Singog In Mongondow Masa In Tanaa

Sambayang kon i datu

¹ Nongkon i Salomo. Oo Allah, tundúdon in hukum-Mu kon i datu, ogoiaidon in kooadil-Mu kon i adí ḷoḷaki i datu.

² Igumon mako sia in mohakim kon umat-Mu podudui in hukum, bo mopoaid in inta moadil kon intau inta dinorot.

³ Igumon mako butá nami in motomoman bo mobiag motompia, bo inta moadil oyúon kon bayongan in bangusa.

⁴ Igumon mako ki Tuhan in moduḷu kon hak in intau inta dinorot, motuḷung kon intau mita nobogá bo moyompat kon intau mita inta nondorot kon i monia.

⁵ Igumon mako sia in umuranpa mokotongod modapot in adí bo ompu kon tungkuḷ in oyúonpa in mata in singgai bo buḷan.

⁶ Igumon mako sia in naonda bo uyan inta noḷabú kon rawang, naonda bo uyan morogot inta nomuntad kon gobá mita.

⁷ Igumon mako kooadil in modugang kon bonu in wakutunea, bo kororomon in moiḻiu kon tungkuḷ in oyúonpa in buḷan.

⁸ Dodatuannea in modugang nongkon dagat mopobayá in dagat, moibandang nongkon pomukaan dapot in toyopan.

⁹ Intau mita inta nogutun kon padang gurun in mohoromat kon inia bo musung in dumokó kon tayowon in sioḷnea.

¹⁰ Datu mita in Tarsis bo ḻibuton mita in modiabí kon sosumba kon inia. Datu mita in Arab bo in Etiopia in mamangoi modia kon iba.

¹¹ Bayongan in datu in dumokóbí kon tayowonnea, bayongan in bangusa mobaḻí atanea mita.

¹² Sin sia in mopoḷuat kon intau dinorot inta diádon mokopongonu, bo intau bogá inta mokuani kon inia.

¹³ Sia in motabi kon rayat nobogá bo intau biasa, bo moposaḷamat in kobiagan in intau inta diá koonu bo onu.

¹⁴ Sia in mopoḷuat kon i monia nongkon pondorotan bo aid mobogat, sin kobiagan monia moḷoben in mangaḻenea kon inia.

¹⁵ Mobiagdon in ki Tuang datu! Igumon mako kon inia ogoian in sosumba buḷawan nongkon Arab. Igumon mako sia in sambayangan pomuḷoi mako bo umuran barakatan.

¹⁶ Igumon mako gandum in bontu-bonturung kon sinangkub in butá, bo tombuḷudnea mita mopuḻing in bungai in pinomuḷa. Igumon mako butánea in moḷumbá naonda bo Buḷud in Libanon, bo intau in kotánea in modugang naonda bo bonok kon rawang.

¹⁷ Igumon mako ki datu in umuran tano-tano bo modapot in mononoi, bo sia in modugangdon totok tango-tangoion kon tungkuḷ in mata in singgai tantúpa oyúon. Igumon mako bangusa mita in mopoigum in barakat naonda bo sia, bo bayongan in intau moguman kon mosanang totok in sia.

¹⁸ Dinayo-dayowdon in ki Tuhan, Allah in Israel! Tongábí Sia in mogaid kon inta mokoherang mita.

¹⁹ Dinayo-dayowdon in tangoi-Nea inta moḷantud dapot in mononoi; igumon mako sinangkub in butá mopuḻing in kamuliaan-Nea! Natuadon in mobaḻí. Amin!

²⁰ Natuata in sambayang mita in Daud, ki adí i Isai.