MAZMUR 71 - Alkitab Singog In Mongondow Masa In Tanaa

Sambayang in intau inta ain noguyang

¹ O Tuhan, kon ini-Mu in poniunganku, dika pomayá mako in akuoi in pokopooyáanmai.

² Poḷuatdon in akuoi, sin Iko in moadil, indongogaipa bo posaḷamatdon in akuoi.

³ Kobaḻídon kon inakó naonda bo buḷud batu pogogutunanku, inta diá moyoyigaku bayáan. Sin sinantú-Mudon kon moposaḷamat kon inakó, Ikobí in pogogadopan bo pononiunganku.

⁴ O Allah, pomiḷaguidon in akuoi nongkon intau moraat, nongkon kawasa in intau mita moromú bo moḻingá.

⁵ Sin Ikobí in pongamanganku, o Tuhan, Tuhan, akuoi in mopirisaya kon ini-Mu pinangkoi kon noguodpa in akuoi.

⁶ Kinoouput in kobiaganku akuoi in kumadai kon ini-Mu; Iko in nogoḻingoi kon inakó pinangkoi kon akuoi pinononggadí dá akuoi in umuranbí modayow kon ini-Mu.

⁷ Kobiaganku in nobaḻí dodayanan kon intau mobayong, sin Ikobí in moḷoḷukadku inta moropot.

⁸ Akuoi in umuranbí modayow kon ini-Mu, kinoouput in singgai potaauku in koagung-Mu.

⁹ Dikabí ḷumbúon-Mu in akuoi kon tungkuḷ in noguyangdon in akuoi dikabí taḷaan kaasí in akuoi aka ropotku in nodaitdon,

¹⁰ sin musungku mita in mongongumandon kon inakó, intau mita inta moibog moḻimod kon inakó in noyopopogdon.

¹¹ Guman monia, “Sinaḷáandon i Allah in sia; igai aḷowan naton bo domokon in sia, sin diábí in moposaḷamat kon inia.”

¹² Dika in Iko yumayú kon inakó, o Allah, Allahku, ḷagidon tuḷungai in akuoi.

¹³ Biódon mako in intau inta monubu kon inakó pokopooyáanmai bo yopúon. Biódon mako in intau inta moibog mopobodito kon inakó motoboḻingo bo ḻibutan in mokooyá.

¹⁴ Táe akuoi in umuranbí mongamang mako kon ini-Mu, bo mokakitdon modayow kon ini-Mu.

¹⁵ Kinoouput in singgai oumanonkubí in oaidan-Mu mita inta moadil, bo kasaḷamatan nongkon ini-Mu inta diá koiapan.

¹⁶ Dayowonku in oaidan-Mu inta motoyang, o Tuhan Allah, powayaku in kooadil-Mu, tongábí kooadil-Mu.

¹⁷ O Allah, Iko in notundú kon inakó pinangkoipamai kon akuoi noguodpa, nodapot in tanaa oumanonku in onu inta inaidan-Mu inta mokoherang.

¹⁸ O Allah, dika taḷaan in akuoi, modapot in mogoguyang in akuoi bo ubanan, sinbá akuoi in mopotaau in kawasa bo kototoyang-Mu kon bayongan in buí inta moiduduimai.

¹⁹ O Allah, kooadil-Mu ná koḷantud in ḷangit; moḷobenbí in oaidan-Mu mita: ki inebí in mokotongkai kon ini-Mu?

²⁰ Inogoian-Mu in akuoi in mobayong in roriga mobogat, táe poguḻíon-Mubí in ropotku bo momiag bui kon inakó nongkon pinoḷobongan.

²¹ Baḻíon-Mu in akuoi totok in horomaton, bo moḻipoi bui kon inakó.

²² Akuoi in modayowbí kon ini-Mu takin gambus, sin Iko in mosatia, o Allahku. Akuoi in moibogbí mopodondong in dondong dodayow kon ini-Mu takin kecapi, o Allah mokudus in Israel.

²³ Akuoi in monggiow takin pia in gina, sindaḷan mopodondong in dodayow kon ini-Mu. Dimukud bo awakku modondong takin pia, sin Iko in noposaḷamatdon kon inakó.

²⁴ Kinoouput in singgai popotaaukubí in kooadil-Mu, sin intau mita inta moibog mopobodito kon inakó ain sinaḷow bo pinokopo oyámai.