MAZMUR 70 - Alkitab Singog In Mongondow Masa In Tanaa

Sambayang mokituḷung

¹ Kon i itoi in mododondong. Nongkon i Daud, kon tungkuḷ in moposumba in kuruban tompoingat.

² O Allah, posaḷamatdon in akuoi, Tuhan, ḷagidon tuḷungai kaasí in akuoi!

³ Biódon mako in intau inta moibog moḻimod kon inakó taḷowon bo moḷagui posibayá. Biódon mako in intau inta nonggiow kon rorigaku bongkugon bo singkuḻeon.

⁴ Biódon mako in intau inta kinumosing kon inakó moitaḻikokog bo mooyá.

⁵ Igumon mako bayongan in intau inta nosumba kon ini-Mu moḷunganga bo mopia in gina; bo bayongan in intau inta moibog in kasaḷamatan nongkon ini-Mu umuran moguman, “Totuubí kon moḷantudbí in ki Tuhan!”

⁶ Akuoi naa in bogá bo moyangkó; ḷagidon angoi, o Allah. Ikobí in mototuḷung bo mopoposaḷamatku, dika kaasí ḷumaḷoi, o Tuhan.