MAZMUR 69 - Alkitab Singog In Mongondow Masa In Tanaa

Sambayang kon tungkuḷ in kinoantugan in yoyiga

¹ Kon i itoi in mododondong. Podudui in dondong: Bungang bakung. Nongkon i Daud.

² Posaḷamatpa in akuoi, o Allah, sin tubig in noidapotdon in sigogowku.

³ Akuoi in noibonu kon dampaḷ inta modaḷom, diá in pomuntukan. Akuoi in noḷomot kon tubig inta moḻinow, iniḻig in bokoḷ kon dodai in tubig noponik.

⁴ Akuoi in kopia mokuani nodapot in noḷopídon totok bo noingkagdon in sigogowku. Mataku in mopomporí in mogoḷat mako kon totuḷung i Allahku.

⁵ Intau inta mondoí kon inakó takin diá in dodoyonan, in mobayo-bayong kon buok kon uḷuku. Intau mita moropot in moibog momatoi kon inakó; mosia in moponapud kon inakó in uboḷ. Akuoi in pinakisa mopobui in kapunyaan inta deeman inagowku.

⁶ O Allah, kinotaauan-Mu in taḷáku mita dosaku in diábí noibuni kon ini-Mu.

⁷ Dikabí pomayá mako in akuoi mokopooyámai kon intau mita inta mongamang kon ini-Mu, o Tuhan, Allah Inta Totok in mokawasa. Dikabí pomayá mako in akuoi mokopoangoi in kotor kon intau mita inta nosumba kon ini-Mu, o Allah in Israel!

⁸ Sin popisíbí in Iko dá siningkuḻe in akuoi, popisí in Iko akuoi in irebeg.

⁹ Akuoi in nádon onda bo intau ango-angoi kon sigad in ginaḷumku, naonda bo intau ibanea kon i guya-guyang bo kon i ai-aiku.

¹⁰ Ibogku in tumagab popisí in tabiku kon Baḷoi-Mu, rebeg in intau inta moningkuḻe kon ini-Mu noitugat kon inakó.

¹¹ Nongombaḷ in akuoi bo nopuasa, táe mosia in noningkuḻe kon inakó.

¹² Akuoi in nopogidaing in karong nobaḻí tomponuot nonogumatoi, táe sinigid monia in akuoi.

¹³ Akuoi in tantú oumanon magí-mako monia kon poyosipunanmai in intau, bo dondong in intau mita nongoḷoḷangu in akuoibí.

¹⁴ Táe akuoi in nosambayang kon ini-Mu, o Tuhan, o Allah, tubagaipa in akuoi kon tungkuḷ inta mopia. Tuḷungaipa in akuoi podoyon kon tabi-Mu inta moḷoben bo popisí in kososatia-Mu.

¹⁵ Dika pomayá mako in akuoi moidoḷop kon bonu in yoná, posaḷamatdon in akuoi kon intau mita inta mondoí kon inakó bo kon tubig inta modaḷom.

¹⁶ Dikabí pomayá mako in akuoi in moḷomot kon bokoḷ inta noponik, bo moitaḷom kon apad in dagat andeka ḷobongon kon bonu in bubú.

¹⁷ Tubagaidon in akuoi, o Tuhan, sin Iko in mopia bo tabi-Mu in mononoi. Bobuipa kaasí in akuoi sin tabi-Mu in totuubí kon moḷoben.

¹⁸ Dikabí mogadop kon mogogundoi-Mu naa, sin moyoyigadon totok in akuoi, ḷagidon tuḷungai mangoi in akuoi.

¹⁹ Angoidon bo posaḷamat in akuoi, poḷuatdon in akuoi nongkon musungku mita.

²⁰ Kinotaauan-Mu kon akuoi in totokbí in irebeg, siningkuḻe bo iraa-raatmai, inontong-Mubí in bayongan in musungku.

²¹ Singkuḻe mita ain nokoinggamá kon ibog in ginaku, bo diádon in kamangku. Sinayakku in totabian, táe diá in mangaḻenea, notayak in akuoi kon poḻipoi, táe diá nokouḻí.

²² Nodapotbí in kaanonku binaukan in rasum; kon dodai in norogang, akuoi inogoian in cuka sin inumon.

²³ Biódon mako in pongaanan monia moyotakin mokoangoi kon bodito, bo mobaḻí poyogaḷap kon mokokiangoi mita monia.

²⁴ Biódon mako in mata monia mobilog bo ḻikud monia in tantúdon moḻemé.

²⁵ Poḷuaidon in torú-Mu kon i monia, biódon mako in mosia kotugatan in torú-Mu inta modoko-dokot.

²⁶ Biódon mako ḷoḷaigan monia moingongow, bo ḷoḷaigan mita monia diádon in mogogutun.

²⁷ Sin mosia in nomogutú kon intau inta ihukum-Mu, bo mongonguman magí-mako kon soaḷ intau inta iyoyiga-Mu.

²⁸ Biódon mako in taḷá monia modugangdon mobayong; dikabí pobanaron in mosia.

²⁹ Biódon mako in tangoi monia popatan kon buk in intau nobiag; bo diá pinais kon bonu in buk in intau motuḻid.

³⁰ Táe akuoi in dinorot bo mogigon kon monakit, buatdon in akuoi o Allah, bo posaḷamatpa in akuoi.

³¹ Dá akuoi in modayow kon i Allah pongin dondong, mopoḷantud kon i-Nia pongin dondong sukur.

³² Tuabí in kinoibog i Tuhan nongkon kuruban sapi, kuruban sapi koḷakian inta moḷoben.

³³ Mokoontong kon tua, inta dinorot mopia-pia in gina, intau inta mosumba kon i Allah moḷoben in gina.

³⁴ Sin ki Tuhan nokidongog kon intau inta nobogá; diábí pinomayá-Nea mako in umat-Nea kon bonu in ponjara.

³⁵ Dayowdon in ki Allah, ei ḷangit bo butá, dagat bo bayongan in mahaḷuk kon bonunea.

³⁶ Sia in moposaḷamatbí kon Yerusalem bo moposindog bui in kotá mita in Yohuda. Umat i Tuhan in mogutunbí kon tua; butá tatua in mobaḻíbí mosia in kitogi.

³⁷ Adí bo ompu in mogabatbí kon tua; intau mita inta moibog kon i Tuhan in mogutunbí kon tua.