MAZMUR 68 - Alkitab Singog In Mongondow Masa In Tanaa

Dondong kinountungan

¹ Kon i itoi in mododondong. Mazmur i Daud.

² Ki Allah in simindog moporarit in musung-Nea intau inta mondoí kon i-Nia in moḷagui nongkon tayowon-Nea.

³ Pinoguntun i Allah in mosia mayá, naonda bo poyok inta inirup bo noinggamádon. Naonda bo lilin inta ḷumoḷayat kon bonu in tuḷú, natuata in intau moraat moinggamá nongkon tayowon i Allah.

⁴ Táe intau motoḷutui in mopia takin moḷunganga in gina, mosia in moronggiow pia in gina kon tayowon i Allah.

⁵ Podondongdon kon i Allah, dayowdon in tangoi-Nea, sadiadon in daḷan moḷoben kon i-Nia inta sinumakoi kon goḷom. Tangoi-Nea in ki Tuhan – poḷungangadon in gina kon tayowon-Nea!

⁶ Ki Allah inta nogutun kon Baḷoi-Nea inta motusi in ki amá in adí uno-unon bo mododuḷu kon inta dongkadon boba-bobay.

⁷ Ki Allah in nobogoi in pogutunan kon intau inta diádon koginaḷum; Sia in nopoḷuaidon kon intau kon ponjara dá nopiadon in gina monia. Táe intau mita inta moḷawang kon i Tuhan mustibí mogutun kon butá inta noḷogat.

⁸ O Allah, kon tungkuḷ in kinapit-Mu in umat-Mu minayá nongin rawang inta noingkag,

⁹ butá nodandú, uyan noḷabú kon tayowon-Mu, sin kinoangoian i Allah in Sinai, Ki Allah in Israel.

¹⁰ Morogot totok in uyan pinoangoi-Mu, bo nomobat kon butá-Mu inta noḷogat.

¹¹ Bo umat-Mu in nogutun kon tua; kon bonu in kopopia-Mu, o Allah, Iko in noḷukad kon intau nobogá.

¹² Ki Tuhan in nomarenta, bo bobay mita in nodia kon habar:

^13-14 “Datu mita takin tontaranea in noḷaguidon!” Mosia in noḷagui naonda bo paḷoma inta iḷumayugdon minayá. Bobay mita kon baḷoi in mosila-silaidon mako kon saḷaka bo buḷawan inta sinaḷáan. Umpaka nobayong in diá dinumudui noparang, umat i Allah in pinountungdon.

¹⁵ Kon tungkuḷ in ki Inta Totok in mokawasa noporaritdon in datu mita kon tua, noionagdon in salju nongkon Buḷud in Salmon.

¹⁶ Buḷud in Basan in buḷud inta motoyang, buḷud inta nobayong in tudunea.

¹⁷ Nongonu sin nongkon tudumu inta mobayong nion iko in mobobuibí takin intoi kon Buḷud in Sion inta piniḻí i Allah pogutunan-Nea? Ki Tuhan in mogutunbí kon tua modapot in mononoi.

¹⁸ Takin puḷúan ribu in kereta inta moropot ki Allah in sinimindog kon yuak monia kon bonu in kamuliaan-Nea.

¹⁹ Ki Tuhan in notakod kon tampat inta moḷantud; nobayong in inta dinakop in dinia-Nea noyotakin. Sia in notarima kon sosumba nongkon intau mita nodapot in nongkon sigad in inanakan momomarontak; sinbá mosia in kibio-biómai moyotakin i Tuhan Allah.

²⁰ Dayowdon in ki Tuhan, sin Siabí in ki Allah inta noposaḷamat kon inaton; pomuḷoi in singgai momotaan in Sia kon dodiaan naton.

²¹ Ki Allah naton in ki Tuhan inta noposaḷamat, Sia in nopoḷuat kon inaton nongkon kinopatoian.

²² Notantú bidon kon butukonbí i Allah in uḷu in musung-Nea, intau mita inta umuran noyobiag in dosa.

²³ Guman i Tuhan, “Ei umat-Ku, dinia-Ku in musungmu nongkon Basan dinia-Ku in mosia nobui nongkon apad in dagat,

²⁴ sinbá moiko mopomatá in dugú monia kon sioḷmu, bo ungkúmu mita in nodilá kon tua modapot in moorop.”

²⁵ Komintanbí moindoi kon pawai kinountungan-Mu, o Allah, Allahku, Datuku, sinakinan minayá kon pogogutunan-Nea.

²⁶ Kon dotá in muna unaan in mododondong, kon dotá in tumi takinan in mopogogitog mita in kecapi; kon yua-yuak in mongodeaga mita mobobongkug kon rebana; nanaa in dodondong monia:

²⁷ “Dayowdon in ki Allah kon yua-yuak in pinoyosipunan in umat-Nea, dayowdon in ki Tuhan, ei bayongan in buí i Yakub!”

²⁸ Benyamin in suku inta totok in mointok, táe sia in kon muna, bodongka moyo-moyodudui in itoi mita in Yohuda kon tuminea in itoi mita in Zebulon bo Naptali.

²⁹ Ki Allahmu in monuntut kon ropotmu; o Allah, iyigonaidon in onu inta ain inaidan-Mu kon inami.

³⁰ Datu mita in nodia kon sosumba kon ini-Mu kon Baḷoi-Mu kon Yerusalem.

³¹ Guakaidon in Mesir, mahaḷuk moraat tatua kon yuak in utó. Toboḷowdon in bangusa mita, paanan in bantong tatua takin ki adínea mita, inta mosiritakandon sin moporigugut in saḷaka. Ki Allah in noporaritdon in bangusa mita inta moibog moparang.

³² Intau mita moḷoben in Mesir namangoi nodia kon bitú; intau in Sudan ḻimikat in modia kon iba kon i Allah.

³³ Podondongdon kon i Allah, ei bayongan in dodatuan, podondongdon in dodayow kon i Tuhan,

³⁴ kon i-Nia inta nongin baḷangon dungkuḷmai. Indongogai! Ki Tuhan in nosingog, singog-Nea in moḷangon totok.

³⁵ Akudon in kawasa i Allah inta nomarenta kon Israel, kawasa-Nea in nodapot kon ḷangit.

³⁶ Totuu mokotongaw in ki Allah naton kon tungkuḷ in Sia iḻumuai nongkon pinogutunan-Nea. Ki Allah in Israel nobogoi in kawasa bo ropot kon umat-Nea. Dinayo-dayowdon in ki Allah!