MAZMUR 66 - Alkitab Singog In Mongondow Masa In Tanaa

Dondong dodayow bo sukur

¹ Kon i itoi in mododondong. Dondong tobatú. Porogiowdon kon i Allah, ei bayongan in butá!

² Podondongdon bo poḷantudon in tangoi-Nea, pomuliadon in Sia takin dodayow mita.

³ Pogumandon kon i Allah, “Totuu mokoherang onu in inaidan-Mu! Musung tumungkud kon ini-Mu takin iḻibutan in ondok, sin totuubí moḷoben in kawasa-Mu.

⁴ Sinangkub in butá dinumokó mosumba kon ini-Mu, mosia in nodondong nodayow kon tangoi-Mu.”

⁵ Angoidon bo indoiaidon in aid i Allah, totuu mokotongaw in bayongan inta inaidan-Nea kon sigad in intau!

⁶ Dagat binaḻí-Nea butá noingkag, mogoguyang nami minaya-mayá in sioḷ in iḷumoḷan kon tua. Dá nopia i gina nami popisí in aid-Nea.

⁷ Sia in nomarenta takin ropot modapot in mononoi. Bangusa mita inindoian-Nea mako, sinbá momomarontak diá motaau ḷumoḷatú kon i-Nia.

⁸ Dayowdon in ki Allah nami, ei bangusa mita, pobaḷúdon in dodayowmu kon i-Nia!

⁹ Sia in noḷukadon kon inami sinbá tantú mobiag, bo diá nopomayá mako kon inami noḷabú.

¹⁰ O Allah, Iko in nonungkuḷdon kon inami naonda bo intau nopomurni in saḷaka kon bonu in tuḷú.

¹¹ Pinomayá-Mu mako in kami in noibonu kon poyogaḷap, bo pinountuan-Mu in dodiaan inta mobogat totok.

¹² Pinomayá-Mu mako in kami iyunta-yuntai in musung; kami in nongin ḷunud bo tuḷú. Táe tanaa in dinia-Mudon in kami kon tampat inta mopia totok.

¹³ Akuoi in modiabí kon kuruban payongon kon Baḷoi-Mu bo mogintompod kon dandiku kon ini-Mu,

¹⁴ Dandi inta siningogku kon tungkuḷ in akuoi kon bonu in susa.

¹⁵ Posumbaku kon ini-Mu kuruban payongon nongkon biag notompiḻí, bembé domba bo sapi koḷakian, poyoknea in moidamonik kon ḷangit.

¹⁶ Angoidon bo indongogaidon, ei bayongan in intau inta motoguondok kon i Allah, oumanonkudon onu inta inaidan i Allah kon inakó.

¹⁷ Akuoi in nokuanidon nokituḷung kon i-Nia; tanaa in pododondongku in dondong dodayow kon i-Nia.

¹⁸ Aka kuma bo mopia in ginaku in monomayá kon aid moraat, yo notantúbí kon doíbí in ki Tuhan mokidongog.

¹⁹ Táe inindongogandon i Allah in akuoi, sinaridiandon i Allah in oigumku.

²⁰ Akuoi in modayow kon i Allah sin Sia in diábí nondoí kon sambayangku, bo diábí nogogai in nonotabi kon inakó.