MAZMUR 65 - Alkitab Singog In Mongondow Masa In Tanaa

Dayow bo sukur

¹ Kon i itoi in mododondong. Mazmur i Daud. Dondong.

² Patusbí in kami modayow kon ini-Mu kon Sion, o Allah, bo mogintompod kon dandi nami kon ini-Mu.

³ Sin Ikobí in motubag kon sambayang; bayongan in intau in mamangoibí kon ini-Mu popisí in ain binaradosa.

⁴ Dosaku mita moiḻiudon in bogat kon inakó, táe inampungan-Mudon.

⁵ Pia in kamang in intau inta piniḻí-Mu, bo inoiní-Mu mogutun kon Baḷoi-Mu. Kami in pooroponbí in bayongan inta mopia kon Baḷoi-Mu, pogogutunan-Mu inta motusi.

⁶ Iko in notubag kon inami pinongin nopountung kon inami, inaidan-Mu in soaḷ mita inta mokoherang sin moposaḷamat kon inami! Ikobí in pinongamangan in bayongan in bangusa nodapot in dagat inta moyayú.

⁷ Pinongin ropot-Mu pinosindog-Mu in buḷud mita, sin mopoontong in kawasa-Mu inta motorindog.

⁸ Pinogogai-Mu in doradak in dagat bo torú in bokoḷ, bo pinoonow-Mu in kinodowawáan in bangusa mita.

⁹ Bayongan in intau kon dunia moondok bo mohoromat in nokoontong kon onu mita in pinomia-Mu inta motoyang. Bayongan in butá nongkon popod tobatú mayá in popod ibanea pinomia-Mu norogiow takin pia in gina.

¹⁰ Butá tatua in iḷukadan-Mu bo inogoian in uyan, pinoḷumbá-Mu dá nobayong in bungai in boyónea. Ongkag mita binonuan-Mu in tubig kinopuḻing, sinadia-Mu in gandum kon i monia, oo, natuata in pinososadia-Mu kon inia.

¹¹ Iko in momonu in tubig kon bayáan in pajeko bo binuntadan-Mu in ḻitodan mita in butánea. Sinobai-Mu in uyan in butánea, bo binarakatan-Mu in kobiagan in pinomuḷanea mita.

¹² Popisí in kopopia-Mu, pomuḷoi in taong sinadia-Mu in bungai in boyónea; kon onda in angoian-Mu, mobayong in mouḻí.

¹³ Padang gurun nopuḻing in bembé domba, bayongan in tombuḷudnea mopia in gina.

¹⁴ Rawang mita in bonok mopoḻimbakut in domba, ḷopá mita nopuḻing in gandum. Komintan morogiow bo modondong takin pia in gina.