MAZMUR 64 - Alkitab Singog In Mongondow Masa In Tanaa

Sambayang mokioḻingoi

¹ Kon i itoi in mododondong. Mazmur i Daud.

² O Allah, indongogaipa kaasí in sambayangku kon tungkuḷ in umaan susa, posaḷamatpa in nyawaku nongkon musung inta mokoondok.

³ Oḻingoiaipa in akuoi nongkon pinoyopopogan in intau moromú, nongkon tomayá molicik in intau mita moraat.

⁴ Dilá monia iḷanitan monia ná koḷanit in kedang, bo mopoyaput in tosingogon mita moḻingá naonda bo piot.

⁵ Nongkon pinogadopannea mosia in mopoyaput in ouman mita uboḷ, diábí in ondok monia moponapud in uboḷ kon intau inta diá kotaḷá.

⁶ Mosia in umuranbí kumadai totok kon niatnea inta moraat, bo mongonguman motaan kon poyogaḷap; kai monia kamai dá diábí in nokoontong.

⁷ Mosia in nonomayá kon inta moraat, bo noguman, “Kami in nonomayá kon inta diá mopia.” Gina bo raian in intau totok in modaḷom, diábí kodoḷopan.

⁸ Táe ki Allah in nopopiotbí in piot-Nea kon i monia, bo indoianmai notompaḻí in mosia.

⁹ Mosia in noyopú popisí in tosingogon monia tontaní; bayongan inta nokoontong kon inia nomombiḻing.

¹⁰ Bo bayongan in intau angoiandon in ondok; mosia in moraidon kon oaidan i Allah bo mopotaa-taau mako kon onu inta ain inaidan-Nea.

¹¹ Dá bayongan in intau mopia in moḷungangabí in gina popisí in onu inta pinomia i Tuhan. Mosia in moniungbí kon i-Nia; bayongan in intau motuḻid in gina in moyunggagábí.