MAZMUR 63 - Alkitab Singog In Mongondow Masa In Tanaa

Tanob kon i Allah

¹ Mazmur i Daud, kon tungkuḷ in sia kon padang gurun Yohuda.

² O Allah, Ikobí in ki Allahku, tayakonku bo kotanobanku in Iko. Naonda bo butá noḷogat inta morogang in tubig, natuata in rogangku kon ini-Mu.

³ Biódon mako in akuoi imindoi kon ini-Mu kon Baḷoi-Mu, bo moindoi kon ropot bo koḷantud-Mu.

⁴ Tabi-Mu in mobara-baraguna nongkon mobiag, tuamai akuoi in modayow kon ini-Mu.

⁵ Kinoouput in kobiaganku akuoi mopoyaput in sukur kon ini-Mu; tonggóonku in ḻimaku kon ini-Mu poḷat mosambayang.

⁶ Dayowonku in Iko takin giow pia in gina, sin Iko in mopoorop in dimukudku naonda bo kaanon inta mopia in nanamnea.

⁷ Kon dodai in akuoi inumuḻid mako kon ḷantaan, kinotoropanku in Iko; kinoouput in doḷom akuoi monano-nanob kon ini-Mu,

⁸ sin Ikobí inta ain notuḷung kon inakó; kon bonu in siungan koḻikip-Mu akuoi in modondong pia in gina.

⁹ Kinadaianku in Iko kinoringkut, ḻima-Mu in noginroton kon inakó.

¹⁰ Táe intau mita inta moibog moḻimod kon inakó in moponagbí kon dunia in intau minatoi.

¹¹ Mosia in matoibí kon bonu in poparangan, bo mobaḻí kokaanon in mahaḷuk moraat.

¹² Datu in mopiabí in ginanea popisí in totuḷung i Allah; intau inta mongibot podoyon kon i Allah in moyunggagábí, táe bibig in intau mouboḷ in pomponanbí.