MAZMUR 62 - Alkitab Singog In Mongondow Masa In Tanaa

Moodom in gina kon diug i Allah

¹ Kon i itoi in mododondong. Podudui in: Yedutun. Mazmur i Daud.

² Noodombí mako in dimukudku mogoḷat mako kon i Allah, tongábí nongkon i-Nia in kasaḷamatanku.

³ Tongábí Sia inta nogoḻiung bo noposaḷamat kon inakó, Sia in mododuḷuku, diábí in akuoi motundan.

⁴ Modapot in toonu in moiko komintan in moibog monubu kon intau inta nádon onda bo dinding noendeg bo dinding inta ain moumpag?

⁵ Moiko in tongábí niat mopoḷabú kon inia nongkon ḷoḻitúannea inta moḷantud. Moiko in moibog monguboḷ; bibigmu pakéon monimu momarakat, táe kon bonu in gina monimu in mongutukbí.

⁶ Noodom in ginaku mogoḷat mako kon i Allah, tongábí nongkon i-Nia in kasaḷamatanku.

⁷ Tongábí Sia in mogoḻiung bo moposaḷamat kon inakó; Sia in mododuḷuku, diábí in akuoi motundan.

⁸ Siabí in ki Allah inta nobogoi kon inakó in kasaḷamatan bo kahoromatan, Sia tua in mogogoḻiungku bo mododuḷuku inta moropot.

⁹ Ei bangusaku, pongamangdon kon i Allah pomuḷoi mako; potaaudon kon i-Nia onu in kon bonu in ginamu, sin Siabí in tampat naton poniungan.

¹⁰ Intau in tongábí gabut in poginaan, moḷoben mointok tumpaḷa diá koboḻi. Aka simbangon, noniata magí nogaanbí in mosia, mogaa-gaanbí kon tompot poginaan.

¹¹ Dikabí mongamang mako kon onu inta agowon, bo dika mopongata in pakakat inagow. Nodapot in aka kaoyúonanmu modugang, dikabí tongádon kon tua in ginamu.

¹² Kotongonumaidon in dinongogku in ki Allah noguman kon kawasa in nongkon i-Niabí,

¹³ bo Sia in umuranbí motabi. Iko, o Tuhan, motuḻí kon batúan in intau podudui in oaidnea.