MAZMUR 61 - Alkitab Singog In Mongondow Masa In Tanaa

Sambayang mopoigum oḻiungan

¹ Kon in itoi in mododondong. Pongin ito-itog kecapi. Nongkon i Daud.

² Indongogaipa kaasí in kuaniku, o Allah, taridiaipa in sambayangku.

³ Noyayú nongkon baḷoi akuoi in mokuani kon ini-Mu, sin akuoi in kinodaitandon in kamang. Iko in mogatodbí kon inakó mayá in pogogadopan inta moaman, tampat inta totuu moḷantud kon inakó;

⁴ sin Ikobí in mogogoḻiungku, poḷoḷukadan inta moropot nongkon musungku.

⁵ Biódon mako in akuoi kinoouput in kobiaganku mogutun kon ḷoḷaigan-Mu, sinbá moaman kon bonu in oḻiung in koḻikip-Mu.

⁶ Sin Iko in nokidongogdon kon dandiku, o Allah, bo nobogoi kon inakó in budel in intau inta mopirisaya.

⁷ Igumon mako ki datu moumur in kobiagan, dá mobiag in sia modapot in inanakan.

⁸ Igumon mako momarenta in sia modapot in mononoi saḷaku datu inta piniḻí-Mu, o Allah, Oḻiungaidon in sia in tabi bo kososatia-Mu.

⁹ Dá akuoi in umuran mopodondong in dodayow kon ini-Mu, poḷat mogintompod kon dandiku pomuḷoi in singgai.