MAZMUR 6 - Alkitab Singog In Mongondow Masa In Tanaa

Sambayang kon bonu in roriga

¹ Kon i itoi in mododondong. Takin ito-itog kecapi. Podudui kon dondong in waḷunea. Mazmur i Daud.

² Tuhan, donaaidon kaasí mosambok kon inakó podoyon kon torú-Mu, donaaidon mohukum kon inakó podoyon kon yaat in gina-Mu.

³ Kotabipa kaasí in akuoi o Tuhan, sin nodaitdon in ropotku, iyotonaidon in akuoi sin mororigadon totok in akuoi.

⁴ Ginaku in diádon motantúmai; modapotbí in toonu kaasí taḷaan-Mu in akuoi, o Tuhan?

⁵ Pobuidon mangoi, Tuhan, bo posaḷamatdon in akuoi, posaḷamatdon in akuoi popisí in tabi-Mu.

⁶ Sin kon dunia in intau minatoi Iko in diá bidon toropon; diábí in modayow kon ini-Mu kon dunia in intau minatoi.

⁷ Moḷopídon bo moyangkódon in akuoi sin mogamuimai; pomuḷoi in doḷom moḷabú in ḷuáku momuntad kon tosiuganku.

⁸ Mataku in moyambotdon popisí in ajar in gina, bo modingungui popisí in musungku mita.

⁹ Bayádon, ei intau mita moraat, sin ki Tuhan in nokidongogdon kon ombaḷku.

¹⁰ Ki Tuhan in nokidongogbí kon oigumku bo notubagdon kon sambayangku.

¹¹ Bayongan in musungku in moitaḻikokogbí bo mooyá bo ḷagidon umundok takin oyá mako.