MAZMUR 59 - Alkitab Singog In Mongondow Masa In Tanaa

Sambayang mokiḷukad

¹ Kon i itoi in mododondong. Podudui in dondong: Dika moyopú. Mazmur i Daud, kon tungkuḷ in ki Saul nopotabá kon intau noḷukad kon baḷoinea sin moḻimod kon inia.

² O Allah, posaḷamatdon in akuoi nongkon musungku mita, oḻingoiaidon in akuoi nongkon intau inta monubu kon inakó.

³ Poḷuatdon in akuoi kon intau inta mopoaid in moraat, pomiḷaguidon in akuoi nongkon moḷoḻimod mita.

⁴ Indoiai, mosia in noḷabot sin moḻimod kon inakó, intau mita moḻingá noyodugang moḷawang kon inakó; bokaka deemanbí popisí in nogaid kon dosa in akuoi andeka iḻimimpat, o Tuhan.

⁵ Deemanbí doman popisí in taḷáku, mosia in iḻimika-ḻikatdon bo mogoḷatdon mako.

⁶ Sindogdon, o Allah Inta Totok in moḷantud, tuḷungaipa in akuoi. O Allah in Israel, indoiaidon tontaní. Pobangondon bo hukumdon in bangusa mita, dikabí motabi kon intau mita moraat inta ain nonoḻikud.

⁷ Kon dodai in ḷoḷabungneadon mobui in mosia, mogoob naonda bo ungkú sindaḷan moḻibu kon kotá.

⁸ Mosia in tantúbí monigid bo moningkuḻe; tosingogon monia in moḷanit naonda bo kedang, kai monia kamai diábí in mokodongog.

⁹ Táe kinosingan-Mubí in mosia, o Tuhan, bayongan in bangusa tatua in siningkuḻe-Mu.

¹⁰ Ikobí in pangkoi in ropotku, akuoi in mongamang mako kon ini-Mu, Iko in tampat poḷoḷaguianku, o Allah.

¹¹ Popisí in kopopia-Nea ki Allahku in namangoi kon inakó, Pinomayá-Nea mako in akuoi nokoontong kon musungku sinaḷow.

¹² Dikabí moḻimod kon i monia, o Tuhan, sinbá bangusaku diá mokoḻiong. Poraritdon bo upetdon in mosia podoyon kon kawasa-Mu, o Tuhan mogogoḻingoi nami.

¹³ Sin mosia in binaradosa pinongin tosingogon monia; biódon mako in mosia moibaaḷ kon bonu in ḷoḷatúnea, sin mosia in moibog mogodi-godi bo monguboḷ.

¹⁴ Yopúdon in mosia kon bonu in torú-Mu, o Allah, yompatdon in mosia kodaiton. Dá bayongan in intau monotaaudon kon ki Allah in nomarenta kon Israel, bo pinomarentaan-Nea in modugang modapot in sinangkub in butá.

¹⁵ Kon dodai in ḷoḷabungnea mobui in mosia, mogaú naonda bo ungkú sindaḷan moḻibu kon kotá.

¹⁶ Mosia in modondaḷoi motayak kon kaanon, bo mogayow aka diá mobotug.

¹⁷ Táe akuoi in mopodondong in ropot-Mu; pomuḷoi in doḷo-doḷom moḷangon in dondongku mopodondong in tabi bo kososatia-Mu. Sin Ikobí in pososingayowanku, pononiunganku kon dodai in mosusa.

¹⁸ O Allah, pangkoi in ropotku, podondongku in dodayow mita kon ini-Mu, sin Ikobí in pononiunganku. O Allah, inta motabi kon inakó.