MAZMUR 58 - Alkitab Singog In Mongondow Masa In Tanaa

Sambayang mokituḻí kon oaid in intau moraat

¹ Kon i itoi in mododondong. Podudui in dondong: Dika moyopú. Mazmur i Daud.

² Ei mongongawasa mita, moadil degá pononantúmu? Nojujur degá in moiko kon dodai in nonisig kon intau?

³ Diá, moiko in nonomayá kon moraat, bo nopoaid kon inta mobogat kon butá tanaa.

⁴ Intau moraat ain noiḷaḻe pinangkoipamai kon bonu in bobuḷadían mosia in nongakaḷdon pinangkoipamai kon pinononggadí.

⁵ Mosia in korasum naonda bo uḷag mobisa, bo momompon kon bongoḷannea naonda bo uḷag kobra bongoḷ

⁶ inta diá mokodongog kon singog in pawang inta mopandoi, andeka singog in mososingog kon totaau inta motoḻindat.

⁷ O Allah, putoḷdon in ingipon mita monia, rabutdon in uwaḷa in singa mita batánea tatua, Tuhan.

⁸ Biódon mako in mosia moinggamá naonda bo tubig inta gumabut, naonda bo piot inta ain notutut.

⁹ Biódon mako in mosia naonda bo kií inta ḷumoḷayat mobaḻí muntong, naonda bo adí mointok inta minatoi kon tungkuḷ in diápa nokoontong kon nobayag.

¹⁰ Kon dodai in diápa kinotaauan, nodaitdon muna in mosia, naonda bo bonok dugi inta noḷunowpa bo diápa noḷantud nodait pinoḷayug in tompot, naonda bo pinomuḷa noingkag.

¹¹ Mokoontong kon intau moraat hukumon, mopia in gina in intau motuḻid, bo momatá kon sioḷnea kon bonu in dugú in intau moromú.

¹² Intau in moguman, “Totuu kon intau mopia in motarimabí kon bungai in oaidnea, totuu, oyúonbí in ki Allah inta monisig kon dunia.”