MAZMUR 56 - Alkitab Singog In Mongondow Masa In Tanaa

Kon bonu in yoyiga mongamang kon i Allah

¹ Kon i itoi in mododondong. Podudui in dondong: Paḷoma inta kibio-biómai, nongkon butá inta moyayú. Mazmur i Daud kon tungkuḷ intau in Pilistin modomok kon inia kon Gad.

² Kotabipa kaasí in akuoi, o Allah, sin sinubu in akuoi, umuranbí in akuoi doroton in musungku mita.

³ Kinoouput in singgai akuoi iyunta-yuntai in saturuku; mobayongbí in mosaturu kon inakó, o Allah Inta Totok in moḷantud.

⁴ Kon dodai in noondok in akuoi, akuoi in nongamang kon ini-Mu.

⁵ Akuoi in nodayow kon i Allah popisí in onu inta pinodandi-Nea; akuoi in mopirisaya kon i-Nia, dá diá moondok in akuoi, diábí mokopongonu in intau kon inakó.

⁶ Kinoouput in singgai musung mopotombauk in pelekaraku, umuranbí in mosia moḷongasi mopobodito kon inakó.

⁷ Mosia in moyosipun kon tampat noiadop, motarap mako kon bayongan inta aidanku, bo motayak kon kasampatan moḻimod kon inakó.

⁸ Oyúon degá in kasaḷamatan kon aid moraat monia? Yopúdon in mosia kon bonu in torú-Mu, o Allah!

⁹ Iko in nogiap kon singgai mita binaya-bayáanku mako, bo nonotaau kon kobayong in ḷuáku; yo degá diá iniap-Mu intua?

¹⁰ Kon singgai in akuoi mokuani kon ini-Mu, musung in bongkugonbí modapot in umundok, sin kinotaauanku kon ki Allah in dumotábí kon inakó.

¹¹ Akuoi in modayow kon i Tuhan Allah, popisí in onu inta pinodandi-Nea.

¹² Akuoi in mopirisaya kon i-Nia, dá diábí in akuoi moondok, intau in diábí mokopongonu kon inakó.

¹³ Akuoi in mogintompodbí kon dandiku kon ini-Mu, o Allah, bo moposumba in kuruban sukur kon ini-Mu.

¹⁴ Sin pinosimparut-Mu in akuoi nongkon popatoi, iḷukadan-Mu in akuoi sinbá diá moḷabú. Dá akuoi in motaaubí mobiag kon bonu in oḻiung i Allah, kon bonu in sindar inta monimbayag kon bayongan inta nobiag.