MAZMUR 55 - Alkitab Singog In Mongondow Masa In Tanaa

Sambayang mopoigum ḷukadan nongkon musung

¹ Kon i itoi in mododondong. Takin ito-itog kecapi. Dondong topotundú i Daud.

² O Allah, indongogaipa kaasí in sambayangku, dika toḻikudan in oigumku.

³ Taridiaipa in akuoi bo tubagaipa in akuoi, morumbun in ginaku popisí in kasusahanku.

⁴ Moḻia-ḻiaw in ginaku sin gogondokon in musung bo pinondorotan in intau moraat. Sin mosia in moposusamai kon kobiaganku, bo takin torú mosaturu kon inakó.

⁵ Ginaku totokbí in mokayow, popatoi inta mokokoningkim umuran moiḷabotmai kon inakó.

⁶ Akuoi naa in kinawasadon in urot bo ondok, ginogondok in porasaan mokoondok.

⁷ Ah, aka kuma bo kokoḻikipan in akuoi naonda bo paḷoma, ḷumayugbí in akuoi motayak kon tampat inta moodom.

⁸ Oo ḷumayugbí in akuoi yumayú totok, bo mogutun kon padang gurun.

⁹ Ḻimikatbí in akuoi motayak kon tampat pogadopan nongkon deḷang bo tompot moropot.

¹⁰ Oo Tuhan, potoboḻingudon in musungku mita, potombaukdon in ouman monia, sin kon kotá inontongkudon in aid motogat bo ropatoi.

¹¹ Singgai doḷom moḻibuan in mosia, mogaid kon inta moraat bo mopomuká in inta mokotombauk.

¹² Kon bayongan in tampat oyúon in porimumudan; pondorotan bo ponombaḷukan in mongawasa kon pasar.

¹³ Aka kuma bo musung in mongempeng kon inakó, yo mokotahangpabí in akuoi. Aka kuma bo saturu inta moningkuḻe kon inakó, yo motaaupabí in akuoi mogadop kon inia.

¹⁴ Táe Ikobí, takinku, yobayatku, yobayat modaginku inta nonoḻikud kon inakó.

¹⁵ Dungkuḷmai noyobayat notompia in kita, bo noyotakinmai noibada kon Baḷoi Tuhan.

¹⁶ Biódon mako in musungku baḷúdon matoi bo kobia-biag moponag kon dunia in intau minatoi, sin aid inta moraat oyúon kon bonu in baḷoi monia, kon yua-yuak monia.

¹⁷ Táe akuoi in nokuani kon i Allah, ki Tuhan in moposaḷamatbí kon inakó.

¹⁸ Singgai doḷom mogamui bo mongombaḷ in akuoi, bo dinongog-Nea in singogku.

¹⁹ Sia in noposaḷamat kon inakó nongkon musung, inta moyoḻipu-ḻipung moḷawang kon inakó.

²⁰ Ki Allah inta nomarenta nongkon pinomangkoian in mongindongogbí kon inakó bo monaḷow kon i monia. Sin mosia in doíbí tumobat, bo diá moondok kon i Allah.

²¹ Yobayatku dungkuḷmai monubu kon yobayatnea mita, iḻimimpatdon in sia kon dodandiannea.

²² Tosingogonnea mita mopia in kodongogan modondouḷug, táe kon bonu in ginanea oyúon in yaat in gina. Potosingognea in moḷukó, táe monurak naonda bo tosilad inta moḷanit.

²³ Posarakaidon in inta mokoḻia-ḻiaw kon ginamu kon i Tuhan, dá Sia in moduḷu kon inimu; sin intau mojujur in diábí pomayá-Nea mako in taḷowon.

²⁴ Táe Iko, o Allah, mopobonubí kon i monia kon bubú inta totok in moonag. Intau mita inta mononombaḷuk bo moḷoḻimod diábí moidapot in tongobotak in umur monia. Táe akuoi in mopirisayabí kon ini-Mu.