MAZMUR 54 - Alkitab Singog In Mongondow Masa In Tanaa

Sambayang mopoigum oḻingoian

¹ Kon i itoi in mododondong. Takin ito-itog kecapi. Dondong topotundú i Daud,

² kon tungkuḷ in intau in Zipi namangoi noguman kon i Saul, “Ki Daud in nogadop kon inami.”

³ O Allah, posaḷamatdon in akuoi pongin kawasa-Mu, ogoiaidon in inta moadil kon inakó podoyon kon ropot-Mu.

⁴ Indongogaidon in oigumku, o Allah, indongogaipa kaasí in tosingogonku mita.

⁵ Sin intau ango-angoi simindog monubu kon inakó, intau moḷoḷatú moibog moḻimod kon inakó, mosia in diábí mopandungmai kon i Allah.

⁶ Táe ki Allah in mototuḷungku; Ki Tuhan in mododuḷuku.

⁷ Sia in mohukumbí kon musungku pongin aid moraat monia tontaní, bo moyompat kon i monia sin Sia in mosatia kon inakó.

⁸ Takin ḻimbatú in gina pinosumbaku in kuruban kon ini-Mu, bo mosukur kon ini-Mu sin mopia in Iko, o Tuhan.

⁹ Iko in nopoḷuatdon kon inakó nongkon bayongan inta mokoondok, bo inontongku musungku in sinaḷow.