MAZMUR 53 - Alkitab Singog In Mongondow Masa In Tanaa

Aid moraat in intau

¹ Kon i itoi in mododondong. Podudui in dondong: Mahalat. Dondong topotundú i Daud.

² Intau dondunguḷ in mosingog kon bonu in gina, “Diábí in ki Allah.” Oaid monia in moraat bo moḻingá; diábí in momia kon inta mopia.

³ Nongkon soroga ki Tuhan in moindoi kon umat intau, sin motayak kon intau mobijak inta nosumba kon i-Nia.

⁴ Táe komintan intau ain nonoḻikud bo moromú diádon tobatúmai in intau in nogaid kon inta mopia.

⁵ Guman i Tuhan, “Diá degá moratak in intau mita moraat tatua? Mosia in nobiag in onu inta inagow kon umat-Ku, bo diá kon dodai in onda in nosambayang kon i-Nakó.”

⁶ Intau moraat in totokbí in angoian in ondok, bokaka diábí in mokoondok, sin ki Allah in moporaritbí in tuḷan in intau inta nongopung kon i monimu; mosia in kinodoídon i Allah, dá taḷowonbí monimu in mosia.

⁷ Nongkon Buḷud in Sion igumon mako mamangoi in kasaḷamatan kon Israel. Dá buí i Yakub in moḷungangabí aka ki Tuhan mopoguḻit bui in kaadaan in umat-Nea.