MAZMUR 52 - Alkitab Singog In Mongondow Masa In Tanaa

Hukuman kon intau moraat

¹ Kon i itoi in mododondong. Dondong topotundú i Daud,

² kon tungkuḷ in ki Doëg, intau in Edom, namangoi nopotaau kon i Saul kon ki Daud in noiyaputdon in baḷoi i Abimelek.

³ Ei intau moropot, nongonu sin iko in mopoḷoḷatúbí in aidmu moraat kon intau inta kinotabi i Allah?

⁴ Kinoouput in iko mongakaḷ bo monomayá kon inta moraat; dilámu naonda bo tosilad pongongarug inta moḷanit.

⁵ Iko in moibo-ibogbí kon inta moraat nongkon inta mopia, moibo-ibog monguboḷ nongkon moguman kon inta mobanar.

⁶ Pinongin tosingogonmu mita iko mongakaḷ bo mopoyaat in gina in intau.

⁷ Táe iko in yompatonbí i Allah modapot in mononoi; iko in dinomok bo pogarab nongkon baḷoimu, bo inggamáandon nongkon dunia in intau nobiag.

⁸ Nokoontongmai kon tua, intau motoḷutui angoian in ondok, bo kumosing kon inimu poḷat moguman,

⁹ “Tuata in intau inta diá namangoi kon i Allah, táe mongamang mako kon kaoyúonan inta mobarong totok bo mogadop kon pakakat inta inagownea.”

¹⁰ Táe akuoi in naonda bo pangkoi in zaitun inta noḷumbá kon bonu in Baḷoi i Allah. Mopirisayabí in akuoi kon ki Allah in umuranbí motabi modapot in mononoi.

¹¹ Akuoi in umuranbí moibog mosukur kon ini-Mu kon tayowon in umat-Mu potaauku in kopopia-Mu.