MAZMUR 51 - Alkitab Singog In Mongondow Masa In Tanaa

Sambayang mokiampung

¹ Kon i itoi in mododondong. Mazmur i Daud

² naonda in sia sinoboḷow i Nabi Natan popisí in nonuaḻing takin i Batsyeba.

³ Kotabipa kaasí in akuoi o Allah, sin Iko in umuranbí oyúon in tabi, popataidon in dosaku sin moḷoben in tabi-Mu.

⁴ Bataaidon in bayongan in aidku moraat; daritaidon in akuoi nongkon dosaku.

⁵ Sin inakukubí in bayongan in taḷáku, dosaku in umurankubí toro-toropon.

⁶ Tongábí kon ini-Mu, tongábí kon ini-Mu binaradosa in akuoi, bo pinomiaku in onu inta inanggap-Mu moraat. Dá patusbí hukumon-Mu in akuoi, moadilbí in pononantú-Mu.

⁷ Totuubí, akuoi in moraat pinangkoi kon dodaipa in pinononggadí, bo kinotugatandon in dosa pinangkoi kon bobuḷadían.

⁸ Iko in monuntut kon kototuḻid in gina; pogonúaidon in ginaku in hikmat-Mu.

⁹ Potusidon in akuoi, dá modaritbí in akuoi; bataaidon in akuoi, dá akuoibí in mobudo-budó in kapot.

¹⁰ Biódon mako in akuoi mokodongog kon habar mokopia kon gina, sinbá gina inta binutuk-Mu naa in buidon monggiow.

¹¹ Dikapa bobuion in dosaku mita, bo popataidon in bayongan in taḷáku.

¹² Baḻídon in ginaku naa modarit, o Allah, toimbagudon in ginaku takin ibog inta moroton.

¹³ Dikadon ḷumbúon in akuoi kon tayowon-Mu, bo dika gamáan in roho-Mu inta motusi kon inakó.

¹⁴ Poḷungangadon in ginaku bui popisí in kasaḷamatan nongkon ini-Mu, ogoiaidon in gina inta moibog tumoindudui kon ini-Mu.

¹⁵ Dá tundúonku in parenta-Mu kon intau baradosa, sinbá mobuidon mangoi in mosia kon ini-Mu.

¹⁶ Posimparutdon in akuoi nongkon popatoi, o Allah mopoposaḷamatku, dá takin pia in gina potaauku in kooadil-Mu.

¹⁷ O Tuhan, tuḷungaipa in akuoi mosingog, dá akuoi in modayowdon kon ini-Mu.

¹⁸ Iko in doíbí kon kuruban ratáan; aka kuma bo akuoi moposumba in kuruban payongon, yo doíbí Iko intua.

¹⁹ Kuruban kon i Allah in ginabí inta norimumud, gina inta motoindudui bo notobat diábí inindoí-Mu.

²⁰ O Allah, poontongpa in kopopia-Mu kon Sion, posindogdon bui in dinding mita in Yerusalem.

²¹ Dá Iko in moibogbí motarima kon kuruban inta patus, kuruban payongon bo kuruban inta noḻimbatú sapi koḷakian in pokurubanbí kon tudu in mezbah-Mu.