MAZMUR 5 - Alkitab Singog In Mongondow Masa In Tanaa

Sambayang mopoigum ḷukadan

¹ Kon itoi in mododondong. Takin itog in bansí. Mazmur i Daud.

² O Tuhan, indongogaipa kaasí in tosingogonku mita, taridiaipa in amuiku mita.

³ Indoiaipa kaasí in oigumku bo tuḷungaipa in akuoi, o Datuku, o Allahku.

⁴ Sin Ikobí in posambayanganku, o Tuhan, indongogaipa kaasí in kuaniku doḷo-doḷom. Doḷo-doḷom diaanku in sosumbaku bo oḷatonku mako in tubag-Mu, o Tuhan.

⁵ Iko in Allah inta doí kon inta aid moraat; inta moraat in diábí motaau in mamangoi kon ini-Mu.

⁶ Doíbí in Iko in moindoi kon intau inta mokaḷakuang, kinodoí-Mubí in intau inta momia kon inta moraat.

⁷ Yopúon-Mu in intau mita inta moibog monguboḷ. Mopopak bo moḷoḻimod mobú in Iko in mokoontong.

⁸ Táe popisí in tabi-Mu inta moḷoben, akuoi in motaaubí tumuot kon bonu in Baḷoi-Mu. Dumokó in akuoi tumayow kon Baḷoi-Mu inta motusi, bo sumbáanku in Iko takin ḻimbatú in gina.

⁹ O Tuhan, totuubí mobayong in saturuku! Kapitdon in akuoi in mogaid kon onu in kinoibog-Mu, bo poontongdon in daḷan-Mu inta musti bayáanku.

¹⁰ Sin tosingogon in musungku in diábí motaau pirisayaanmai; gina monia in nopuḻing in tomayá moraat. Tosingogon monia in mopia mokooangá, táe bonu in dodob monia nopuḻing in moraat.

¹¹ Hukumdon in mosia, o Allah, pomayádon mako in mosia mobodito popisí in tomayánea tontaní. Untundon in mosia sin nobayongdon in dosa monia, sin mosia in nomarontakdon kon ini-Mu.

¹² Igumon mako bayongan in intau inta noniung kon ini-Mu mopia in gina bo tantú monggoḷokap. Ḷukadaidon in intau mita inta motabi kon ini-Mu, sinbá moḷunganga in gina monia popisí in Iko.

¹³ Sin barakatan-Mu in intau inta motoindudui kon ini-Mu, ḷukadan-Mu in tabi-Mu in mosia.