MAZMUR 49 - Alkitab Singog In Mongondow Masa In Tanaa

Kaoyúonan diábí motaau pongata

¹ Mazmur in inanakan i Korah. Kon i itoi in mododondong.

² Indongogaidon, ei bayongan in bangusa, taandon mako in bongoḷan, ei intau mita in dunia,

³ pinomayá intau biasamai, andeka intau inta sinangoian, pinomayá intau nobogá, andeka intau nooyúon.

⁴ Akuoi in mopoyaputbí in tosingogon mita inta mobijaksana, onu in kon raianku naa totuubí modaḷom.

⁵ Akuoi in monondudutbí kon pribahasa, bo moginsilang kon mangaḻenea sindaḷan mokuti kon kecapi.

⁶ Akuoi in diábí moondok kon tungkuḷ in singgai diá mopia, tungkuḷ in akuoi kinopung in musung inta moraat.

⁷ Mosia tua in mopongata in kaoyúonannea, bo mopododia in kapunyaannea.

⁸ Totuubí kon diábí in tobatúmai in mokoposaḷamat kon awaknea tontaní, andeka mobogoi in tontobutnea kon i Allah.

⁹ Onuka in ogoinea diábí mokotugat; moiḻiu in ḷantud in boḻi in tontobut kon nyawanea,

¹⁰ sinbá moisimparut in sia kon popatoi bo mobiag modapot in mononoi.

¹¹ Diá, sia in mokoontongbí kon intaukabí inta mobijaksana yo matoibí doman. Intau dondunguḷ bo pompuḷong tumpaḷabí moyopú, bo monaḷámai kon kapunyaannea kon intau ibanea.

¹² Mosia in mogutunbí kon poḷoḷobongan modapot in mononoi; tuabí in pogutunan monia motantú, umpakabí dungkuḷmai mosia mobayong in butá.

¹³ Intau in diábí umuran mobiag kon bonu in kaoyúonan; naonda bo mahaḷuk, sia in moyopúbí doman.

¹⁴ Natuata in ukur in intau inta mopongata in awaknea, bo singgai moiduduimai in intau inta moorop in tosingogonnea.

¹⁵ Naonda bo domba, mosia in sinantúbí kon matoi; popatoi in mobaḻí gombala monia. Doḷo-doḷom mosia sinaḷowdon in intau mojujur; awak monia in ḷagidon mobongkog kon dunia in intau minatoi, noyayú kon pogogutunan inta mopia totok.

¹⁶ Táe ki Allah in mopoḷuatbí kon inakó, Sia in mopoḷuatbí kon inakó nongkon kawasa in popatoi.

¹⁷ Dika moondok aka intau tobatú bo mobaḻí mooyúon, bo kapunyaannea in modugang mobayong.

¹⁸ Sin kon tungkuḷ in matoi sia in diábí mokopodia kon onu bo onu, kapunyaan in diábí moponag kon poḷoḷobongan takinnea.

¹⁹ Nodapot in aka intau tobatú nobiag nokouḻí kon kobiagannea, bo dinuí-duí popisí in inta nouḻínea,

²⁰ yo sia in moiduduibí doman kon mogoguyangnea mayá in tampat inta mosindip modapot in mononoi.

²¹ Intau in diábí umuran mobiag kon bonu in kaoyúonan, naonda bo mahaḷuk, sia in moyopúbí doman.