MAZMUR 48 - Alkitab Singog In Mongondow Masa In Tanaa

Sion, kotá i Allah

¹ Mazmur in inanakan i Korah.

² Totuubí moḷantud in ki Tuhan bo totok in dinayow kon kotá i Allah naton, kon tombuḷud inta motusi.

³ Sion, tombuḷud i Allah nosindog notompia kotá i Datu Moḷantud mokopia kon gina in sinangkub in butá.

⁴ Ki Allah in nogutun kon komaḻig-Nea mita, noniata magí Siabí tontaní in moḷoḷukad-Nea.

⁵ Indoiaika, datu mita in moyosipun; mosia in mamangoi sin moibog monubu.

⁶ Táe mokoontong kon tombuḷud tatua, noitongau in mosia; nodoḻiok in mosia bo noḷagui notoboḻingo.

⁷ Kon tua mosia in nourot in ondok bo mogigon kon monakit, naonda bo bobay inta mononggadí,

⁸ naonda bo kapaḷ inta norimumud in deḷang.

⁹ Ná inta dinongog naton, tanaa in inontongdon naton intua, kon Kotá i Tuhan Inta Totok in mokawasa. Kotá tatua in Kotá i Allah naton, Dinuḷuannea intua nodapot in mononoi.

¹⁰ Kon bonu in Baḷoi-Mu kami in monano-nanob kon tabi-Mu, o Allah.

¹¹ Tangoi-Mu kinotaauandon totok bo dinayow kon sinangkub in butá, Iko in nomarenta nokopoadil.

¹² Biódon mako rayat in Sion bo Yohuda norogiow pia in gina, sin ihukum-Mu in musung monia.

¹³ Ḻibudon in Sion, ḻibudon in sia, bo iyapdon in ḷangkeangnea.

¹⁴ Taridiai in dindingnea, pirikisadon in bentengnea, sinbá motaau in moiko mongonguman kon buímu:

¹⁵ “Siabí tua in ki Allah, Allah naton modapot in mononoi, Sia in modia kon inaton modapot in mononoi.”