MAZMUR 47 - Alkitab Singog In Mongondow Masa In Tanaa

Ki Allah in Mongongawasa inta Moḷantud

¹ Mazmur in inanakan i Korah. Kon i itoi in mododondong.

² Ponggoḷokapdon takin pia in gina, ei bayongan in bangusa! Dayowdon in ki Allah takin yogiow!

³ Sin ki Tuhan Inta Totok in moḷantud in motoyang, Datu Momulia inta nongawasa kon sinangkub in butá.

⁴ Pinopountung-Nea in kita kon bangusa mita, binaḻí-Nea in kita mongogawasa kon suku mita in bangusa.

⁵ Piniḻí-Neadon kon inaton in butá budel naton, inta kinoyunggaga in bangusa inta kinotabi-Nea.

⁶ Ki Allah in noponikdon kon pomomarentaan-Nea, sinakinan in giow bo singog in sangkakala.

⁷ Podondongdon in dodayow kon i Allah, podondongdon in dodayow kon i Datu naton!

⁸ Ki Allah in datu kon sinangkub in butá, dayowondon in Sia in dondong inta mopia!

⁹ Ki Allah in iḻimitú kon pomomarentaan-Nea inta motusi; Sia in nomarenta kon bangusa mita.

¹⁰ Itoi mita in bangusa mita noyodugangdon nobaḻí umat i Allah inta kinoibog i Abraham. Sin ki Allah in datu in bayongan in datu, totuu moḷantud bo momulia.