MAZMUR 46 - Alkitab Singog In Mongondow Masa In Tanaa

Ki Allah in kotaki-takin bo motuḷung kon inaton

¹ Mazmur in inanakan i Korah. Kon i itoi in mododondong. Pinongin dondong Alamot.

² Ki Allah in mogogoḻingoi bo pangkoi in ropot naton; Sia in umuranbí taḷaoḷat bo mokotuḷungbí kon bonu in yoyiga.

³ Dá diábí moondok in kita, umpakabí modandú in dunia, bo buḷud mita moitaḷom kon apad in dagat;

⁴ umpakabí dagat modoḻiok bo mobokoḷ moḷoben, bo tombuḷud mita mourot popisí in kodangatannea.

⁵ Oyúon in daḷan tubig inta mokopia kon gina kon kotá i Allah, pogogutunan i Allah Inta Totok in moḷantud.

⁶ Ki Allah in nogutun kon tua, dá kotá tatua in diábí moinggamá; Tuḷungan-Neabí kon dodai in modiugdon mobayag.

⁷ Ki Allah in nonggotup, dá dunia in norimumudon totok; bangusa mita in modoḻiok, dodatuan mita noobat.

⁸ Ki Tuhan Inta Totok in mokawasa moyotakin naton, ki Allah i Yakub noḷukad kon inaton.

⁹ Igai, indoiaika mongo onu in pinomia i Tuhan, totuu mokoherang in oaidan-Nea kon dunia!

¹⁰ Sia in nopogogai in parang kon sinangkub in dunia, piot bo pandong irimumud-Nea, kaḻeaw noḻimbung in sinubá-Nea.

¹¹ Kai-Nia, “Pogogaidon moparang; pokotaaudon, Akuoi naa in Allah, Akuoi in momulia kon sigad in bangusa mita, momulia kon sinangkub in butá.”

¹² Ki Tuhan Inta Totok in mokawasa kotaki-takin naton, ki Allah i Yakub noḷukad kon inaton.