MAZMUR 45 - Alkitab Singog In Mongondow Masa In Tanaa

Dondong kon ponikaan in datu

¹ Mazmur in inanakan i Korah. Dondong tabi. Kon i itoi in mododondong. Podudui in nada: Bungang bakung.

² Tosingogon mita mopia noiḷuai nongkon ginaku, posumbaku in dondongku kon i datu. Naonda bo pomomais in pujangga inta motoḻindat, diláku in nosadiadon mopoyaput in pantun.

³ Iko in moḷuna-ḷunat kon sigad in intau mita, tosingogonmu komintan inta mopia, tuamai iko in binarakatan i Allah modapot in mononoi.

⁴ Pogabitdon in kedangmu kon ogotan, ei datu inta motorindog, iko in totok in momulia bo motaingkat!

⁵ Bayádon takin torindog momatuk kon inta mokountung moḷongasi kon inta mobanar bo moadil inta moḷukó; podoyon kon ropotmu batukdon in kountungan inta moḷoben!

⁶ Piotmu inta moḷanit moiḷambai kon putú in musungmu, bangusa mita in moḷabú kon tayowon in sioḷmu.

⁷ Ki Allah in nobogoi in kawasa kon inimu momarenta, kawasa-Mu in modapotbí in mononoi; pinodoyon kon inta moadil iko in momarenta kon rayatmu.

⁸ Iko in moibog in inta mobanar bo mondoí kon inta moraat; tuamai, ki Allah, Allahmu ain nomiḻí kon inimu, bo nopoḷunganga kon inimu noiḻiu kon datu mita ibanea.

⁹ Ḷambungmu nobó in taḷong mobondu, gaharu, bo sondana; mopogogitog in musik kon komaḻig nokopia kon ginamu.

¹⁰ Kon sigad in dayang-dayang in komaḻig oyúon in ki adí mita bobay i datu. Kon dotá in koḷanan pomomarentaan oyúon in ki buḷoi i datu takin nopoḷambá in buḷawan taakan.

¹¹ Ei adí bobay, indongogaipa in tosingogonku mita, ḻiongdon in bangusa bo inanakanmu.

¹² Koḷoḷunatmu in mokoḻiai kon gina i datu, sia in ki tuangmu, kotoinduduidon kon inia.

¹³ Intau in Tirus in nodia kon sosumba kon inimu; intau nooyúon moḷongasi mogamá kon ginamu.

¹⁴ Ki adí bobay i datu tumuot takin taingkat, ḷambungnea ginaboḷan in buḷawan.

¹⁵ Takin nogiḷambung inta noyagi-yagimai in batangannea dinia in sia minayá kon i datu, sinakinan in mongodeaga, yobayatnea mita, mosia in pinopoangoi doman kon i datu.

¹⁶ Mosia in morogiow takin pia in gina kon tungkuḷ in inatod tumuot kon komaḻig in datu!

¹⁷ Iko, datuku, in mokouḻíbí kon mobayong in adí ḷoḷaki sin ḻimitú kon pomomarentaan in mogoguyangmu. Mosia in baḻíonmubí mongogawasa kon sinangkub in dunia.

¹⁸ Pinongin dondong tanaa poḷantudonku in iko modapot in adí bo ompu bangusa mita in modayowbí kon inimu modapot in mononoi.