MAZMUR 44 - Alkitab Singog In Mongondow Masa In Tanaa

Sambayang mokiḷukad

¹ Mazmur in inanakan i Korah. Dondong topotundú. Kon i itoi in mododondong.

² O Allah, ain dinongog nami tontaní in ouman inta inouman in mogoguyang nami onu inta motoyang inaidan-Mu kon tungkuḷ intua.

³ Iko tontaní in noguntun kon bangusa mita sinbá umat-Mu in mogutun motantú kon butá monia. Bangusa mita ibanea pinobodito-Mu, táe umat-Mu in pinomayá-Mu mako in kodugangannea.

⁴ Butá tatua in diábí inagow monia nopomaké in kedang; diábí doman ropot monia tontaní in nokopountung kon i monia, táe pinodoyonbí kon kawasa bo sindar in kinoangoian-Mu, sin noibog in Iko notuḷung kon umat-Mu.

⁵ Ikobí in Datuku bo Allahku, inta nopountung kon umat-Mu.

⁶ Pinodoyon kon kawasa-Mu kami in nonaḷow kon musung nami, bo nopotungkud kon intau mita inta nonubu kon inami.

⁷ Sin akuoi in diábí nopongata in piotku, nodapot in kedangku diábí mokoposaḷamat kon inakó.

⁸ Táe Ikobí in noposaḷamat kon inami nongkon musung, bo nonaḷow kon intau mita inta nondoí kon inami.

⁹ Dá kami in umuranbí mopoyunggaga kon ini-Mu, bo tantú mopoyaput in sukur kon ini-Mu.

¹⁰ Táe tanaa Iko in nonaḷá kon inami bo nopomayá mako kon inami taḷowon. Iko in diádon minayá noyotakin nami kon poparangan.

¹¹ Pinomayá-Mu mako in kami in moḷagui kon musung nami, bo mosia in nogagow kon kapunyaan nami.

¹² Pinomayá-Mu mako in kami in sinotad naonda bo domba, bo pinorarit-Mu in kami kon yua-yuak in bangusa mita.

¹³ Pinotaḷui-Mu in umat-Mu totuu moompá in boḻinea, bo diá nokouḻí kon kauntungan onu bo onu.

¹⁴ Binaḻí-Mu in kami tososingkuḻe in topodiug mita mosia in mopoḷoḻekemai bo kumosing kon inami.

¹⁵ Binaḻí-Mu in kami tososigid in bangusa mita; momombiḻing in mosia poḷat moningkuḻe kon inami.

¹⁶ Kinoouput in singgai akuoi empengon, bo oyá in moikaḷumbun kon inakó,

¹⁷ sin mokodongog kon rebeg bo singkuḻe nongkon bibig mita in musung bo mototagú kon gina.

¹⁸ Tua komintan ain noiantug kon inami umpaka diá in kami nokoḻiong kon ini-Mu andeka nonoḻikud kon dodandian-Mu bo inami.

¹⁹ Gina nami in diábí momayow kon ini-Mu; parenta-Mu in umuranbí pandungon nami.

²⁰ Táe sinaḷáan-Mu in kami kon bonu in sindip; diádon mokopongonu in kami kon yua-yuak in mahaḷuk moraat.

²¹ Aka kuma bo kami in diádon nosumba kon i Allah, táe nosambayangdon kon i ilah ibanea mako,

²² yo notantúbí kon kinotaauanbí i Allah, sin kodoḷopan-Neabí in onu inta noibuni kon gina nami.

²³ Popisí in dinumudui kon ini-Mu dá kami in umuranbí gogondokon in popatoi, bo pinomia naonda bo domba inta rorataan.

²⁴ Pobangondon kaasí, o Tuhan! Nongonu sin mosiugbí in Iko? Sindogdon! Dika mondoí kon inami modapot in mononoi.

²⁵ Nongonu sin mogadopbí in Iko, bo moḻiong kon bayongan in roriga bo susa nami?

²⁶ Kami in noḷabú bo norimumud kon butá, noiboḻingkayang kon ḷobud popisí in kotaḷá.

²⁷ Sindogdon bo angoidon tuḷungai in kami, posaḷamatdon in kami sin Iko in motabi kon inami.