MAZMUR 43 - Alkitab Singog In Mongondow Masa In Tanaa

Sambayang kon butá pinoḷumbúan

¹ Ogoidon kon inakó in inta moadil, o Allah, duḷuaidon in hakku nongkon bangusa inta moraat. Poḷuatdon kaasí in akuoi nongkon intau moraat bo motombuḻitok.

² Ikobí in ki Allah moḷoḷukadku; nongonu sin taḷaan-Mubí in akuoi? Nongonu sin akuoi in umuranbí mobaba kon roriga popisí in doroton in musungku mita?

³ Poniatadon in kososatia-Mu sin monindar bo mokapit kon inakó, sinbá akuoi in mobui mayá in Sion, tombuḷud-Mu inta motusi bo mayá in Baḷoi pogogutunan-Mu.

⁴ Dá akuoi in mopobayádon in mezbah i Allah, kon tayowon i Allah pangkoi in kopiaanku. Akuoi in modondongbí bo mopogogitog in kecapi, sin modayow kon ini-Mu, o Allah, Allahku.

⁵ Nongonu sin moajarbí bo moḻia-ḻiaw in ginaku? Akuoi in mongamang kon i Allah, dá akuoi in buipabí mopoyaput in sukur kon i-Nia, kon i Allahku bo mopoposaḷamatku.