MAZMUR 4 - Alkitab Singog In Mongondow Masa In Tanaa

Sambayang doḷom

¹ Kon tongganut in kor. Pinongin oitog kecapi. Mazmur i Daud.

² O Allah, Ikobí in mododuḷuku; tubagaibí aka akuoi mokuani. Kon dodai in akuoi inumaan in susa; sinuḷungan-Mu in akuoi; dá tanaa kotabipa kaasí in akuoi bo indongogaipa in sambayangku.

³ Ei intau mita, dapotpa in toonu moiko in mopoompámai kon i Allahku? Modapot in toonu moiko motabi kon inta diá in mangaḻenea bo momatuk kon inta diá totuu?

⁴ Pokotaaudon, ki Tuhan ain nomiḻí kon i-Nia tontaní tobatú intau inta kinotabi-Nea. Ki Tuhan in mokidongogbí aka mokuani in akuoi kon i-Nia.

⁵ Kourotdon sin moondok bo dikadon bui mogaid kon mokobaradosa Tano-tanobbí pokopia, kon tungkuḷ in umuḻid mako kon tosiugan.

⁶ Posumbadon in sosumba inta kinoibog-Nea bo popirisayadon kon i Tuhan.

⁷ Mobarong in intau in moḻibó, “Ki ine in momarakat kon inaton?” Igumon mako koibog-Mupa in kami, o Tuhan.

⁸ Binaḻí-Mu in gina-Ku nodugang noḷunganga noiḻiu kon ḷunganga in intau inta nokouḻí kon bungai in boyó mobarong.

⁹ Dá akuoi in umuḻid bo mosiug takin pia-pia mako, sin tongábí Iko, o Tuhan, in mobogoi kon inta mokoodom kon kobiaganku!