MAZMUR 39 - Alkitab Singog In Mongondow Masa In Tanaa

Sambayang mokituḷung

¹ Kon i itoi in mododondong. Mazmur i Daud. Kon i Yedutun.

² Iraiku, “Akuoi in moḷukad kon awak sinbá diá baradosaan in diláku. Akuoi in doíbí mosingog kon dodai in intau moraat nodiugpa.”

³ Akuoi in kibio-biómai diábí noposingo-singog, nodapot in nokorugibí tontaní. Bo rorigaku in korasaan naonda bo modugang mobogat;

⁴ moḻia-ḻiawdon totok in ginaku. Aka umuran raion, dá modugang mosusa in ginaku; imbuitnea nogumandon in akuoi,

⁵ “Tuhan, potaaudon mongo toonu in singgai kopatoianku sinbá kotaauanku kon totuubí mopoḷok in kinobiaganku.”

⁶ Totuu mopoḷok in kobiaganku inta sinantú-Mu! Aka kon ini-Mu wakutu kinobiaganku diábí in mangaḻenea. Totuu, intau naa in tongábí naonda bo poginaan,

⁷ kobiagannea in moitaḻib naonda bo oḻinow. Bayongan in oaidannea diá in mangaḻenea; sia in momonturung kon kapunyaan, táe diá kotaauan mongo ki ine in mokaan kon tua.

⁸ Tanaa onu in oḷatonku mako, o Tuhan? Kon ini-Mubí in pongamanganku.

⁹ Poḷuatdon in akuoi nongkon bayongan in dosaku, dika pomayá mako in akuoi tororebeg in intau dondunguḷ.

¹⁰ Akuoi in kibio-biómai bo diá mobuká kon bibig, sin Ikobí in nosambok kon inakó.

¹¹ Gamádon bui in hukuman-Mu nongkon inakó, sin akuoi in gogiódon matoi in kinotugatan in sambok-Mu.

¹² Intau in popisí in taḷánea; ihukum bo sinambok-Mu naonda bo sisik irimumud-Mu onu inta koboḻi kon inia. Totuu, intau in naonda bo tongá pogirupan in tompot.

¹³ Indongogaipa kaasí in sambayangku o Tuhan, taridiaipa in oigumku; dikabí kaasí tongá kibio-biómai aka akuoi mongombaḷ. Naonda bo bayongan in mogoguyangku, tongábí motoyong akuoi in moniung kon ini-Mu.

¹⁴ Dika monuyayow kon inakó, sinbá moḻin sanangpa in akuoi, kon tungkuḷ in akuoi diápa mayá bo diádon bui.