MAZMUR 37 - Alkitab Singog In Mongondow Masa In Tanaa

Ukur in intau moraat bo intau mopia

¹ Nongkon i Daud. Dika tumorú popisí in intau moraat, dika mointoi kon intau inta nogaid kon noitaḷá.

² Sin mosia in ḷagidon moinggamá naonda bo bonok, bo moḷaḷow naonda bo pinomuḷa noḷunow.

³ Popirisayadon kon i Tuhan, bo aidaidon in inta mopia, pogutundon kon butá tatua bo kotoḷutuidon.

⁴ Tayakdon in kopiaanmu kon i Tuhan, Pooropon-Neabí in ibog in ginamu.

⁵ Poandoḷdon in kobiaganmu kon i Tuhan, pongamangdon kon i-Nia, Sia in motuḷungbí kon inimu.

⁶ Poniata-Neabí in kototoinduduimu naonda bo bayag, bo kototuḻid in ginamu naonda bo singgai.

⁷ Oḷatdon mako in ki Tuhan takin gina moodom, ḷukadaidon mako pokosabar modapot in Sia mopoaid. Dika tumorú popisí in intau inta nokouḻí kon kobiagannea, andeka inta nonompobaḻik.

⁸ Dika tumorú bo monanaḻi in gina, tua in tongábí mokobodito.

⁹ Sin intau inta mogaid kon moraat in inggamáanbí, táe inta nongamang mako kon i Tuhan in motarimabí kon butá tatua.

¹⁰ Intau moraat in ḷagibí moinggamá, aka tayakon, yo diá bidon in sia.

¹¹ Intau inta moompá in dodia in motarimabí kon butá tatua, bo mokouḻíbí kon kobiagan motompia totok.

¹² Intau moraat in monomayábí kon inta moraat kon intau mopia, bo mobobui kon inia takin yaat in gina.

¹³ Táe kosinganbí i Tuhan in intau moraat, sin kinotaauan-Neabí in imbuit in kobiagan in intau tatua in nodiugdon.

¹⁴ Intau moraat norabut kon kedang bo nopopiot in piotnea sin moḻimod kon intau nobogá bo nororiga, sin momatoi kon intau inta mobiag mopia.

¹⁵ Táe intau moraat in kotumbukanbí in kedangnea tontaní, puḷu in piot monia in putoḷonbí.

¹⁶ Moyakagkabí in nouḻí in intau mopia tuabí in mopia-pia nongkon kapunyaan mobayong in intau moraat.

¹⁷ Sin kawasa in intau moraat in putoḷonbí i Tuhan, táe intau mopia in ḷukadan-Neabí.

¹⁸ Ki Tuhan in noḷukad kon kobiagan in intau motoḷutui, kapunyaan budel monia in umuranbí mononoi.

¹⁹ Kon tungkuḷ in mororiga, diábí moajar in mosia, kon dodai in malarat in kaanon yo mosia in diábí kodaitan.

²⁰ Táe intau moraat in moyopúbí, musung i Tuhan in moinggamábí naonda bo bungang kon rawang, mosia in mobuḻibí kon bonu in poyok.

²¹ Intau moraat in moḷuan bo diá mopobui kon onu inta iḷuanannea, táe intau mopia in mobogoibí takin pia in gina.

²² Intau inta binarakatan i Tuhan in motarimabí kon butá tatua, táe intau inta kinutuk-Nea in untunon-Neabí.

²³ Ki Tuhan in motundú kon daḷan in intau inta kobobiagnea mokosanang kon i-Nia;

²⁴ Aka moḷabú in sia, yo diábí in sia kekeban modaḷom, sin kinadaianbí i Tuhan in sia kon ḻimanea.

²⁵ Pinangkoi kon noguodpa in akuoi nodapot in noguyangdon, diábí kon dodai in onda in inontongku intau mopia sinaḷáan i Tuhan, andeka ki adí bo ki ompunea in dongka kino igu-igumnea mako.

²⁶ Sia in umuranbí mopoḷuan bo mobogoi, bo ki adínea mita in nobaḻí barakat kon inia.

²⁷ Taḷaaidon in inta moraat, aidaidon inta mopia, dá modapotbí in mononoi in buímu mogutun kon butá tatua.

²⁸ Sin ki Tuhan in motabibí kon oaid inta mopia bo moadil, intau inta motoindudui kon i-Nia in diábí bio-bióon-Nea mako in moiḷaḻe. Sia in moḷukadbí kon i monia modapot in mononoi, táe buí in intau moraat in yompatonbí.

²⁹ Intau motoḷutui in motarimabí kon butá tatua, bo mogutun kon tua modapot in mononoi.

³⁰ Intau mopia mosingog takin bijaksana, sia in umuranbí motuḻid kon bonu in singognea.

³¹ Hukum i Allahnea in umuran kon bonu in ginanea, sia in diábí iḻimimpat kon tua.

³² Intau mopia tarapon mako in intau moraat inta motayak kon kasampatan moḻimod kon inia.

³³ Táe diábí pinomayá mako i Tuhan in sia moḷabú kon bonu in kawasa in musung, andeka hukumon kon dodai in sisigan.

³⁴ Pongamangdon kon i Tuhan bo duduiaidon in parenta-Nea, dá duíon-Neabí in iko sin mogabat kon butá tatua; iko in mokoontongbí kon poyopúan in intau moraat.

³⁵ Akuoi in nokoontongdon kon intau moraat tobatú inta moambungangaḷ; sia in naonda bo pangkoi in kayu inta mopia bo uakatnea in noikanom noonag.

³⁶ Kon tungkuḷ in akuoi moitaḻib, sia in diá bidon onda, sinayakku in sia, táe diá nouḻíku.

³⁷ Tondudutka in intau mopia bo motuḻid in gina; intau inta moibog in dodamean mopiabí in kobiagannea moiduduimai.

³⁸ Táe intau binaradosa in yopúonbí; buí monia in inggamáanbí.

³⁹ Ki Tuhan in moposaḷamatbí in intau motoḷutui, bo moḷukad kon i monia kon tungkuḷ in mororiga.

⁴⁰ Sia in notuḷung bo noposaḷamat kon i monia, bo nopoḷagui kon i monia nongkon intau mita moraat, sin mosia in noniung kon i-Nia.