MAZMUR 35 - Alkitab Singog In Mongondow Masa In Tanaa

Sambayang mokituḷung

¹ Mazmur i Daud. Tuhan, tayowaidon in intau inta monayow kon inakó, parangdon in intau inta momarang kon inakó.

² Gamádon in piot bo kaḻeaw-Mu, bo sindogdon motuḷung kon inakó.

³ Kadaiaidon in pandong bo ginubat-Mu sin monayow kon intau inta mondudur kon inakó. Potaaudon kon inakó kon Iko in mopoposaḷamatku.

⁴ Biódon mako in intau inta moibog moḻimod kon inakó taḷowon bo pokopooyáanmai. Biódon mako in intau inta noyopakat monayow kon inakó umundok takin motoboḻingo.

⁵ Biódon mako in mosia duduran in malaekat i Tuhan, naonda bo kepa pinoḷayug in tompot.

⁶ Biódon mako in mosia duduran in malaekat i Tuhan kon daḷan inta nosindip bo norondog.

⁷ Diábí in mangaḻenea pinotaanan monia kon poyogaḷap kon inakó andeka mongaḻi kon bubú sin podomokan kon inakó.

⁸ Biódon mako in mosia koantugan in bodito inta diá binutu-butunganmai. Biódon mako in mosia moibonu bui kon poyogaḷap monia tontaní bo moḷabú poḷat moyopú.

⁹ Dá moḷunganga in ginaku popisí in ki Tuhan, mopia in ginaku sin Sia in noposaḷamat kon inakó.

¹⁰ Takin ḻimbatú in gina akuoi in moguman, “Tuhan, diábí in motaau popotongkaian kon ini-Mu! Iko in nopoḷuat kon inta moyangkó nongkon i inta moropot, inta nobogá bo nororiga nongkon i inta nondorot kon inia.”

¹¹ Sakusi mita inta moraat in sinimindog noḷawang kon inakó, bo noponapud kon akuoi in nogaid kon inta diá kinotaauanku.

¹² Aidku inta mopia sinuḻían monia in aid moraat; akuoi in noḷomot kon dodai in kinobuḻian in kamang.

¹³ Kon dodai in mosia notakit, morobonoḷ in ginaku bo diá nongaan; akuoi in nosambayang bo kinumuyung,

¹⁴ naonda bo nosambayang kon utat tobatú andeka yobayat modagin tobatú. Akuoi in kinumuyung bo inombaḷanku in mosia, naondadon bo akuoi in nonogumatoi kon i ináku tontaní.

¹⁵ Táe kon tungkuḷ in akuoi nosusa, nopia in gina monia, bo nosipun sin monayow kon inakó. Mosia in mayá moposedo-sedo sin moningkuḻe kon inakó.

¹⁶ Mosia in umuranbí mopoḷoḻeke kon intau ḻempeng, bo mobobui kon inakó takin yaat in gina.

¹⁷ Modapot in toonu, o Tuhan, modapot in toonu Iko in tongá umuran moindoi mako? Posaḷamatdon in akuoi nongkon ponubuan monia, popoḷaguidon in nyawaku nongkon singa mita tatua.

¹⁸ Dá akuoi in mopoyaputbí in sukur kon ini-Mu kon yua-yuak in umat-Mu, bo modayow kon tangoi-Mu kon bonu in poyodungkuḷan monia.

¹⁹ Dikabí pomayá mako in akuoi in poyambáan in intau inta nondoí kon inakó takin diá in popisínea. Dika pomayá mako in akuoi in giowan in intau inta nondoí kon inakó takin diá in kinodoyonan.

²⁰ Moaḷus in pososingog monia; mosia in monomayábí kon monombuḻitok kon intau inta nobiag nopopiaan.

²¹ Mosia in nomaḷú kon inakó bo noguman kon mosia in nokoontongdon kon dodiaku.

²² Táe Iko, Tuhan, ain nokoontong kon tua; dikabí kaasí tongá kibio-biómai, o Tuhan, dikabí mokopoyayú kon inakó.

²³ Sindogdon bo duḷuai in pelekaraku, o Allahku bo Tuhanku, tuḷungaipa kaasí in akuoi!

²⁴ Duḷuaidon in akuoi, sin Iko in moadil, o Tuhan Allahku, dikabí pomayá mako in musungku monggiow kon inakó.

²⁵ Dika pomayá mako in mosia in mosingog kon bonu in gina, “Sukur, irabutdon naton in nyawanea. Onu in kinoibog naton kinoduduiandon!”

²⁶ Biódon mako in intau inta mosanang in gina in nokoontong kon rorigaku in motoboḻingodon bo mooyádon. Biódon mako in intau inta ḷumoḷatú kon inakó in singkuḻeon bo pokopooyáanmai.

²⁷ Igumon mako intau inta moibog moindoimai kon inakó in ogoi in monggiow bo mopoḷunganga in gina. Igumon mako mopobui-buimai in mosia in moguman, “Totuubí kon moḷantud totok in ki Tuhan! Ibogon-Nea sinbá mosaḷamatbí in mogogundoi-Nea!”

²⁸ Dá akuoi in mopotaa-taaubí mako in kooadil-Mu, bo modayow kon ini-Mu kinoouput in singgai.