MAZMUR 34 - Alkitab Singog In Mongondow Masa In Tanaa

Dodayow potubag kon pia i Tuhan

¹ Mazmur i Daud, kon tungkuḷ in sia sinumon intau nobundai kon tayowon i Abimelek, dá inuntun in sia bo minayá.

² Akuoi in moibog mosukur kon i Tuhan pomuḷoi mako, bo diá mogoga-gogai in modayow kon i-Nia.

³ Akuoi in moibog yumunggagá sin oaidan i Tuhan; igumon mako kodongogan in intau inta dinorot bo moḷunganga in ginanea.

⁴ Poḷantudon in ki Tuhan takinku, igai moyotakin mopomulia kon tangoi-Nea.

⁵ Akuoi in nosambayang kon i Tuhan, bo sinubagan-Nea, bo nopoḷuat kon inakó nongkon bayongan inta mokoondok.

⁶ Intau dinorot nongamang kon i-Nia bo mopia in gina, diábí in dodoyonan monia kon mooyá.

⁷ Intau nororiga in nokuani bo sinubagan i Tuhan, nopoḷuat kon inia nongkon bayongan in roriganea.

⁸ Malaekat i Tuhan in moḷukad kon intau inta mopirisaya, bo mopoḷuat kon i monia nongkon anib.

⁹ Nanamaidon tontaní naonda in kopopia i Tuhan, pia in kamang in intau inta namangoi kon i-Nia.

¹⁰ Horomatdon in ki Tuhan, ei moiko umat-Nea, sin intau inta mopirisaya in diábí kodaitan.

¹¹ Umpaka singa mita yo gogoyonbí doman popisí in kodaitan in kaanon; táe intau inta mosumba kon i Tuhan in diábí kodaitan.

¹² Indongogaidon, ei mongoadí mita, tundúonku in moiko mohoromat kon i Tuhan.

¹³ Moibog degá in moiko moumur in kobiagan bo motarima kon inta mopia?

¹⁴ Dika mosingog kon inta mongoraat, bo dika moibog kon tompobaḻik.

¹⁵ Poyayúdon in inta moraat, bo aidaidon in inta mopia, ḷongasidon totok in mobiag mododamean.

¹⁶ Ki Tuhan in monaridi mako kon intau inta motoḷutui, Sia in mokidongog aka mosia mokuani mokituḷung.

¹⁷ Táe intau inta mogaid kon moraat in doíon-Nea; aka matoi in mosia yo baḷú koḻiongan.

¹⁸ Aka intau motoḷutui mokuani, indongogan i Tuhan, bo poḷat moposaḷamat kon i monia nongkon bayongan in roriganea.

¹⁹ Ki Tuhan in nodiug kon intau inta kinobuḻian in kamang; bo moposaḷamat kon intau inta noinggamá in ibog.

²⁰ Mobayongbí in roriga in intau mopia, táe ki Tuhan in mopoḷuatbí kon inia nongkon bayongan intua.

²¹ Awaknea in umuranbí iḷukadan i Tuhan, diábí in tobatúmai in tuḷannea in putoḷon.

²² Inta moraat in matoibí popisí in aidnea moraat, intau inta mondoí kon intau motoḷutui in hukumonbí.

²³ Ki Tuhan in moposaḷamatbí kon mogogundoi-Nea mita; inta nosingayow kon i-Nia in diábí hukumon.