MAZMUR 33 - Alkitab Singog In Mongondow Masa In Tanaa

Dondong dodayow

¹ Ei intau mita motoḷutui, porogiowdon takin pia in gina sin onu inta ain inaidan i Tuhan; patusbí in intau motuḻid in gina umuran modayow.

² Posukurdon kon i Tuhan takin kecapi, modondong kon i-Nia takinan in musik.

³ Podondongdon in dondong mobagu kon i Tuhan, kutidon kopia in kecapi bo porogiowdon takin sanang!

⁴ Bayongan in tosingogon i Tuhan in totuubí; Sia in mosatiabí kon bayongan in oaidan-Nea.

⁵ Sia in motabi totok kon kojojujur bo kooadil; sinangkub in butá nopuḻingbí in tabi-Nea.

⁶ Ki Tuhan in nomarenta, dá nobaḻí in ḷangit; mata in singgai, buḷan bo tundi pinomia-Nea pinongin tosingogon-Nea.

⁷ Bayongan in tubig kon dagat sinobatú-Nea kon tampat tobatú, baḷangon sinipun-Nea kon bonu in bandungan.

⁸ Biódon mako sinangkub in butá motoguondok kon i Tuhan bo intau mita kon dunia mohoromat kon i-Nia.

⁹ Sin Sia in nosingog, bo bayongan yagi-yagi binaḻí; Sia in nomarenta, dá bayongan yagi-yagi nooyúon.

¹⁰ Ki Tuhan in nopogogai kon bayongan in tomayá mita in bangusa mita, Sia in nonginggamá kon niat monia.

¹¹ Táe tomayá i Tuhan in umuranbí mobaḻí, toimbaḷoi-Nea in moroton kinoouput in kobiagan.

¹² Pia in kamang in bangusa inta nongaku kon ki Tuhan in ki Allahnea, pia in kamang in umat inta piniḻí-Nea nobaḻí kapunyaan-Nea!

¹³ Nongkon soroga ki Tuhan in moḷongow monag, bo ontongon-Neabí in bayongan intau.

¹⁴ Nongkon pomomarentaan-Nea ki Tuhan in nonaridi kon bayongan inta nogutun kon butá.

¹⁵ Siabí inta nomia kon gina monia, bo nonotaau kon bayongan in oaid monia.

¹⁶ Datu in diábí nountung popisí in nobarong in tontaranea, prajurit in deemanbí nosaḷamat popisí in ropotnea.

¹⁷ Kabaḷo in diábí motaau pongata kon mokountung, ropotnea inta moḷoben in diábí mokosaḷamat.

¹⁸ Ki Tuhan in moḷukad kon intau mita inta mopirisaya inta mongamang mako kon tabi-Nea.

¹⁹ Sia in noposaḷamat kon i monia nongkon popatoi, bo nomiag kon i monia kon tungkuḷ in ginogoi.

²⁰ Dá kita in moharap kon i Tuhan, Siabí in mototuḷung bo mododuḷu kon inaton.

²¹ Mopia in gina naton popisí in Sia bo mopirisaya kon tangoi-Nea inta motusi.

²² Igumon mako kami umuran kotabi-Mu, o Tuhan, sin kami in mongamang mako kon ini-Mu.