MAZMUR 32 - Alkitab Singog In Mongondow Masa In Tanaa

Pongakuan bo pongampungan

¹ Mazmur i Daud. Dondong totundú. Pia in kamang in intau inta dosanea in pinopatan, bo taḷánea in inampungan.

² Pia in kamang in intau inta aidnea moraat diádon irekengmai i Tuhan, bo inta doí mongakaḷ.

³ Kon dodai in akuoi diá mongaku kon dosaku, moḷungkoyódon in akuoi popisí in mogamui kinoouput in singgai.

⁴ Singgai doḷom Iko in mondorot kon inakó, Tuhan, ropotku in nodait naonda bo sinotop in patú in singgai.

⁵ Bo akuoi in nongakudon kon dosaku kon ini-Mu, taḷáku diá in binuniku. Sinantúkudon kon akuonku kon ini-Mu, bo inampungan-Mu in bayongan in dosaku.

⁶ Tuamai in pomuḷoi in intau inta motoḷutui musti mosambayang kon tungkuḷ in koumaan in roriga, dá aka ḷunud in susa moiangoi, sia in diábí kodangatannea.

⁷ Ikobí in pogogadopanku, Pinoḷuat-Mu in akuoi nongkon roriga. Dá akuoi in nonggoḷokap pia in gina, sin Iko in noposaḷamatdon kon inakó.

⁸ Guman i Tuhan, “Akuoi in motundúbí kon daḷan inta musti bayáanmu, iko in kapiton-Kubí bo tongginaan-Ku.

⁹ Dika naonda bo kabaḷo inta diá in raian, inta musti diaan in sabarak bo tontogot sinbá dumudui.”

¹⁰ Intau binaradosa kinoantugan in roriga mobayong; táe intau inta nongamang kon i Tuhan umuranbí iḷukadan in tabi-Nea.

¹¹ Ei intau mita motoḷutui, pokosanangdon bo pokoḷungangadon sin onu inta ain pinomia i Tuhan Porogiowdon takin pia in gina, ei bayongan in intau inta motuḻid in gina!