MAZMUR 31 - Alkitab Singog In Mongondow Masa In Tanaa

Mongamang kon i Allah

¹ Kon i itoi in mododondong. Mazmur i Daud.

² Akuoi in mokioḻingoi kon ini-Mu o Tuhan, dika pomayá mako in akuoi pokudaion. Posaḷamatdon in akuoi podoyon kon kooadil-Mu

³ indongogaipa kaasí in akuoi bo ḷagidon poḷuat in akuoi. Ikodon in mobaḻí buḷud batuku tampat pogadopanku, naonda bo benteng inta moropot, inta mokosaḷamat kon inakó.

⁴ Oo, Iko in naonda bo buḷud batu bo benteng inta moropot kon inakó! Kapitdon in akuoi podudui in dandi-Mu.

⁵ Poḷuatdon in akuoi nongkon potait inta sinaan kon inakó, sin Ikobí in pogogadopanku.

⁶ Kon bonu in kawasa-Mu posarakanku in awakku; Iko in mopoḷuat kon inakó, o Tuhan, Allah inta mosatia.

⁷ Intau inta mosumba kon berhala kinodoí-Mu; táe akuoi in mopirisaya kon i Tuhan.

⁸ Mopiabí in ginaku bo moḷunganga sin Iko in umuran motabi kon inakó. Iko in noindoi kon rorigaku bo nonondudutmai kon susahku.

⁹ Diábí pinomayá-Mu mako akuoi in dakopon in musung, táe inogoi-Mubí in akuoi maya-mayá mako takin diá in ḷabot.

¹⁰ Kotabipa kaasí in akuoi, o Tuhan, sin akuoi in kinoantugan in susa; mopomporí in mataku sin mongombaḷ, dimukud bo awakku in mororigadon totok.

¹¹ Kobiaganku modait kon bonu in roriga, taongku mita moitaḻib kon bonu in amui mita. Ropotku in mogaat popisí in aidku moraat, nodapot in tuḷanku mita moripú.

¹² Akuoi in tososingkuḻe in bayongan in musungku, nodapot in kon topodiugkumai. Bayongan in intau inta nogogintaauanku moitaḻikokog aka mokoontong kon inakó, moḷagui in mosia aka moyodungkuḷku kon daḷan.

¹³ Akuoi in iḻiongdon naonda bo intau minatoi, bo nádon onda bo pakakat inta iḷumbú.

¹⁴ Kon ondaka umuranbí oyúon in mokokoningkim; dongogonku in yogombong mita in musungku. Mosia in moyopakat moḷawang kon inakó, bo momia kon tomayá sin moḻimod kon inakó.

¹⁵ Táe akuoi in mongamang mako kon ini-Mu, o Tuhan, sin Ikobí in ki Allahku.

¹⁶ Iko in umuranbí moḷukad kon inakó; posaḷamatdon in akuoi nongkon musungku mita, bo nongkon intau mita inta mogaḷow kon inakó.

¹⁷ Igumon mako Iko in moibogpa kon mogogundoi-Mu; posaḷamatpa kaasí in akuoi popisí in tabi-Mu.

¹⁸ Dikabí pomayá mako in akuoi pokopooyáanmai, o Tuhan, sin akuoi in nokuani kon ini-Mu. Biódon mako intau moraat pokopooyáanmai, bo kibio-biómai moponag kon dunia in intau minatoi.

¹⁹ Tukumaidon in bibig intau mouboḷ inta takin ḷoḷatú mongempeng kon intau motuḻid in gina.

²⁰ Totuu mobayong in tabi-Mu inta sinadia-Mu kon intau inta mopirisaya! Pomuḷoi in intau mokoontong kon kopopia inta pinomia-Mu, kon i monia inta nokioḻingoi kon ini-Mu.

²¹ Iko in nobuni kon i monia kon siungon-Mu nongkon toḻimpaan in intau moraat; Iḷukadan-Mu in mosia kon bonu in kawasa-Mu nongkon inta pinonapud in ḷawang.

²² Dinayo-dayowdon in ki Tuhan! Totuu mokoherang in tabi-Nea kon inakó, kon tungkuḷ in akuoi kinopung bo sinubu.

²³ Kon dodai in notoboḻingo kon inakó kamai yo akuoi in iḷumbú bidon i Tuhan kon tayowon-Nea. Táe noniatadon kon ki Tuhan in nokidongogdon kon oigumku kon tungkuḷ in akuoi nokuani kon i-Nia.

²⁴ Kotabibí in ki Tuhan, ei bayongan in umat-Nea, Ki Tuhan in moḷukadbí kon intau inta mosatia. Táe intau moḷoḷatú in hukumon-Nea takin diá in ukuran.

²⁵ Iropotai bo irigonai in ginamu, moiko komintan inta nongamang kon i Tuhan!