MAZMUR 30 - Alkitab Singog In Mongondow Masa In Tanaa

Sambayang sukur

¹ Mazmur i Daud. Dondong pongimpaḷutan kon baḷoi i Allah.

² Akuoi in modayow kon ini-Mu, o Tuhan, sin Iko in noposaḷamatdon kon inakó bo diá nopomayá mako kon musungku nonggoḷokap kon inakó.

³ Tuhan Allahku, akuoi in mokuani kon ini-Mu mokituḷung, bo Iko in nongundam kon inakó.

⁴ Iko in nopomiḷagui kon inakó nongkon dunia in intau minatoi, bo nomiag bui kon inakó nongkon sigad in intau mita minatoi.

⁵ Podondongdon in dondong dodayow kon i Tuhan, ei umat inta motoindudui, bo posukurdon kon i Inta Totok in motusi.

⁶ Sin tongábí motoyong in ki Tuhan in tumorú, kopopia-Nea in umuranbí oyúon modapot in kinoouput in kobiagan. Kon tungkuḷ in doḷom mongombaḷ in akuoi, táe modiug mobayag kodongogandon in ḷunganga in gina.

⁷ Kon tungkuḷ in noaman, akuoi in noguman, “Akuoi in diábí taḷowon!”

⁸ Sin Iko in mopia kon inakó, o Tuhan, Binaḻí-Mu in akuoi naonda bo buḷud inta moroton. Táe onda intua nogadop in Iko kon inakó, bo inangoiandon in ondok in akuoi.

⁹ Kon ini-Mu, o Tuhan, pokuanianku, kon i Tuhan in poigumanku,

¹⁰ “Onu in mangaḻenea kon ini-Mu aka akuoi matoi bo moponag kon bubú inta poḷobongan? Yo degá intau matoi modayow kon ini-Mu bo mopotaau in kososatia-Mu?

¹¹ Indongogaipa, o Tuhan, bo kotabipa in akuoi. Tuhan tuḷungaipa kaasí in akuoi!”

¹² Amuiku ain binaḷuian-Mu nobaḻí tayok pia in gina, Ginamá-Mu in robonoḷ in ginaku bo inogoian-Mu in akuoi in ḷunganga in gina.

¹³ Dá akuoi in doíbí tongá kibio-biómai; podondongku in dodayow kon ini-Mu, o Tuhan Allahku, bo mopoyaput in sukur kon ini-Mu modapot in mononoi!