MAZMUR 29 - Alkitab Singog In Mongondow Masa In Tanaa

Singog i Tuhan kon bonu in deḷang

¹ Mazmur i Daud. Dayowdon in ki Tuhan ei mahaḷuk mita in soroga, dayowdon in kamuliaan bo kawasa-Nea.

² Dayowdon in tangoi i Tuhan inta momulia sumbadon in Sia takin mogiḷambung in ḷambung pooibada.

³ Ki Allah inta momulia nonggotup kon ḻimonik in dagat, singog-Nea in kinodongogan kon ḻimonik in baḷangon.

⁴ Singog i Tuhan kinodongogan, nopuḻing in kawasa bo kototorindog.

⁵ Singog i Tuhan nokoumpag kon pangkoi mita in kayu, nomutoḷ kon tanga in ḷokuyú in Libanon.

⁶ Buḷud in Libanon binaḻí-Nea iḷumansik naonda bo ki adí in sapi, Buḷud in Siryon iḷumanduk naonda bo ki adí in bantong.

⁷ Singog i Tuhan nokopopisí kon kilat nonampí.

⁸ Singog i Tuhan nokoḷundan kon padang gurun, Ki Tuhan in noḷundan kon padang gurun Kades.

⁹ Singog i Tuhan nodandú kon pangkoi mita in kayu nunuk, bo nokototak kon dáun mita kon kayuon; bo kon Baḷoi i Tuhan umat nomaḷú, “Dayowdon in ki Tuhan!”

¹⁰ Ki Tuhan in nongawasa kon ḷunud moḷoben, Sia in nongawasa saḷaku Datu modapot in mononoi.

¹¹ Igumon mako ki Tuhan mobogoi in ropot kon umat-Nea, bo nopomia kon i monia mobiag motompia.