MAZMUR 26 - Alkitab Singog In Mongondow Masa In Tanaa

Sambayang in intau inta diá kotaḷá

¹ Mazmur i Daud. Ogoiaipa in inta moadil in akuoi, o Tuhan, sin akuoi in nobiag takin notuḻid in gina. Akuoi in nongamang kon i Tuhan, bo diábí in ḻia-ḻiaw in gina tongopiḻikmai.

² Taridiaidon in akuoi, o Tuhan, bo tungkuḷaidon in akuoi, tarididon in ibog bo raianku.

³ Umuranbí toroponku in tabi-Mu, bo umuran motoindudui kon ini-Mu.

⁴ Akuoi in doíbí moyosipun in intau moakaḷ, andeka moyobayat in intau inta moburidilá.

⁵ Kinodoíku in pinoyosipunan in intau inta mogaid kon moraat, akuoi in yumayú kon inanakan inta moraat.

⁶ Sinomokanku in ḻimaku nobaḻí tomponuot kon diá kotaḷá, bo minayá noḻibu kon mezbah-Mu, o Tuhan,

⁷ sindaḷan mopodondong in dondong sukur, bo mopotaau in aid-Mu inta mokoherang.

⁸ Akuoi in moibog kon Baḷoi-Mu, o Tuhan, pinogutunan-Mu inta notangkup in kamuliaan.

⁹ Dika moḻimod kon inakó takin intau binaradosa, andeka morabut kon nyawaku takin moḷoḻimod.

¹⁰ Mosia in tantúbí momia kon inta moraat, bo umuranbí mogoḷat mako kon doit posogó.

¹¹ Táe akuoi in nobiag notuḻid in gina, kotabipa bo poḷuatdon kaasí in akuoi.

¹² Dá moiḷaguidon in akuoi nongkon bayongan in anib, akuoi in modayow kon i Tuhan kon bonu in poyodungkuḷan in umat-Nea.