MAZMUR 25 - Alkitab Singog In Mongondow Masa In Tanaa

Sambayang mopoigum sinbá kapiton bo ḷukadan

¹ Mazmur i Daud. Kon ini-Mu, o Tuhan, poyaputku in sambayangku,

² o Allahku, akuoi in mopirisaya kon ini-Mu! Dika pomayá mako in akuoi pokopooyáanmai, bo goḷokapan in musungku mita.

³ Intau inta nonoḻikud kon ini-Mu in pokopooyáanbímai, táe inta mopirisaya kon ini-Mu in diábí pokudaion.

⁴ Poontongdon in koibog-Mu kon inakó, o Tuhan, poniatadon onu inta musti aidanku.

⁵ Tundúdon bo kapitdon in akuoi kon mobiag podudui in koibog-Mu, sin Ikobí in ki Allah inta noposaḷamat kon inakó, akuoi in umuranbí mongamang kon ini-Mu.

⁶ Toropdon in kopopia bo tabi-Mu, o Tuhan, inta pinoontong-Mu nongkon dungkuḷ.

⁷ Ampungaidon kaasí in dosa bo taḷá kon dodai in akuoi nobagupa, toropdon in akuoi podudui in tabi bo kopopia-Mu.

⁸ Sin ki Tuhan tua in mopia bo moadil, Sia in motundú kon daḷan kon i monia inta noiḷaḻe.

⁹ Ki Tuhan in mokapit kon intau inta moompá in gina, bo motundú kon i monia onu in kinoibog-Nea.

¹⁰ Intau inta motoindudui kon dodandian bo hukum-Nea, yo kotabi-Neabí in mosia takin satia.

¹¹ Tuhan, ampungaidon in akuoi podudui in dandi-Mu, sin moḷobendon in taḷáku.

¹² Ki Tuhan in motundú kon intau inta mopirisaya in daḷan inta musti bayáan monia.

¹³ Mosia in umuranbí mobiag mooyúon, adí bo ompu monia in mogabatbí kon butá budel.

¹⁴ Ki Tuhan in yobayat in intau inta mopirisaya, Sia in moponiata in makusud-Nea kon i monia.

¹⁵ Mataku in umuranbí moindoi kon i Tuhan, sin Sia in noposaḷamat kon inakó nongkon anib.

¹⁶ Indoiaipa kaasí in akuoi, bo kotabipa in akuoi, sin moingongow in akuoi bo mororiga.

¹⁷ Roriga in ginaku kodugang-kodugangdon poḷuatdon in akuoi nongkon rorigaku,

¹⁸ Tondudutdon in roriga bo susahku, bo ampungaidon kaasí in bayongan in dosaku.

¹⁹ Indoiaika totuu mobarong in musungku; mosia in totokbí in mondoí kon inakó.

²⁰ Ḷukadaidon bo posaḷamatpa in akuoi, sinbá diá mooyá in akuoi, sin akuoi in noniung kon ini-Mu.

²¹ Poigumon mako kopiaan bo kojojujur moḷukad kon inakó, sin akuoi in mongamang kon ini-Mu.

²² O Allah, poḷuatdon in umat-Mu nongkon bayongan inta mokororiga kon inia.