MAZMUR 24 - Alkitab Singog In Mongondow Masa In Tanaa

Datu Momulia

¹ Mazmur i Daud. Ki Tuhanbí in kitogi kon butá bo tombonunea, dunia bo bayongan inta nogutun kon tua.

² Sia in nogukat kon dodoyonannea kon tudu in dagat, bo noposindog intua kon tudu in tubig inta noḻinow.

³ Ki ine in motaau motakod kon Tombuḷud i Tuhan, bo tumuot kon bonu in Baḷoi-Nea?

⁴ Intau inta diá in bogit in raian bo oaidnea, inta diá nongibot ubo-uboḷ bo diá nosumba kon berhala.

⁵ Siabí tua inta barakatan bo posaḷamaton i Tuhan, bo poniata i Allah kon diá kotaḷá.

⁶ Natuata in intau inta mamangoi kon tayowon i Allah, inta namangoi nosumba kon i Allah i Yakub.

⁷ Bukádon kooḷad in bonawang koyongan, sinbá tumuot in ki Datu inta momulia.

⁸ Ki ine in ki Datu inta momulia? Siata in ki Tuhan inta motorindog; ki Tuhan inta nopuḻing in kawasa, inta nountung kon pinoparangan.

⁹ Bukádon kooḷad in bonawang koyongan, sinbá tumuot in ki Datu inta momulia.

¹⁰ Ki ine in ki Datu inta momulia? Ki Tuhan Inta Totok in Mokawasa, Siata in datu inta momulia!