MAZMUR 23 - Alkitab Singog In Mongondow Masa In Tanaa

Ki Tuhan in gombalaku

¹ Mazmur i Daud. Ki Tuhan in gombalaku, diábí in diá kon inakó.

² Sia in nopouḻid kon inakó kon rawang in bonok inta noḷunow. Sia in nokapit kon inakó minayá in tubig inta noḷonong.

³ Sia in nobogoi in ropot mobagu kon inakó, bo notundú kon inakó in daḷan inta moitutui, podudui in dandi-Nea.

⁴ Umpakabí akuoi mongin ḷopá inta mosindip, diábí in akuoi moondok in anib, sin Iko in nogindua kon inakó. Iko in noḷukad kon inakó naonda bo gombala noḷukad kon dombanea nomaké in tungkud bo popangkuḷ.

⁵ Iko in nogoḷud kon pongaananku, kon tayowon in musungku. Iko in notomu kon inakó naonda bo mokokiangoi inta ihoromat. Iko in nobogoi kon inakó in oinumon mobayong totok inta mopia.

⁶ Kinotaauanku kon Iko in mopiabí totok kon inakó, bo umuranbí motabi kon inakó. Dá motaaubí in akuoi mogutun kon Baḷoi-Mu kinoouput in kobiaganku.