MAZMUR 22 - Alkitab Singog In Mongondow Masa In Tanaa

Sambayang kon dodai in kinoantugan in roriga bo dondong dodayow

¹ Kon i itoi in mododondong. Podudui in dondong: Rusa kon dodai in modiug mobayag. Mazmur i Daud.

² Allahku, o Allahku, Nongonu sin sinaḷáan-Mubimai in akuoi? Akuoi in nokuani, táe Iko in umuranbí noyayú bo diá notuḷung kon inakó.

³ O Allahku, akuoi in nokuani kon tungkuḷ in singgai, táe Iko in tantúbi kibio-biómai. Akuoi in nosambayang doḷom, ginaku diá doman moodom.

⁴ Táe Iko in Datu Inta Totok in motusi, inta dinayo-dayow in Israel.

⁵ Mogoguyang nami in nongamang kon ini-Mu, mosia in nongamang, bo pinosaḷamat-Mu in mosia.

⁶ Mosia in nokuani kon ini-Mu bo pinosaḷamat-Mu; mosia in nongamang bo diá pinokudai.

⁷ Táe akuoi naa in oḷuasi, deemanbí intau, irebeg bo siningkuḻe in intau mobayong.

⁸ Bayongan inta nokoontong kon inakó, noempeng kon inakó, noruit kon bibig bo nomombiḻing.

⁹ Mosia in noguman, “Pobiódon mako in sia mopongata kon i Tuhan, sinbá ki Tuhan in moposaḷamat kon inia, aka mopia in gina i Tuhan kon inia!”

¹⁰ Ikobí inta nopoḷuai kon inakó nongkon bobuḷadían, bo noodom kon dodai in sinompunuk i ináku.

¹¹ Nongkon pinononggadípamai, ukurku in kon bonubí in kawasa-Mu, pinangkoipabímai kon bonu in bobuḷadían, Ikobí in ki Allahku.

¹² Dikabí yumayú, sin anib in nodiugdon, bo diá in motuḷung.

¹³ Naonda bo paanan in bantong, musung noḻipung kon inakó, naonda bo bantong kaḻig nongkon Basan mosia in nongopung kon inakó.

¹⁴ Mosia in sinumayow kon inakó takin bibig monia noibukádon mako, naonda bo singa inta noganggor bo modomok.

¹⁵ Ropotku in nodait naonda bo tubig inta noibutak, bayongan in tuḷanku noipilat nongkon poguḻingkitannea, ginaku in ḷumoḷayat naonda bo lilin.

¹⁶ Sigoḷokku noingkag naonda bo rumog in posilag, diláku notorondódon. Tuhan, sinaḷáan-Mu in akuoi kon tudu in ḷobud nádon onda bo intau inta ain minatoi.

¹⁷ Akuoi in kinopung in paanan intau moraat; naonda bo paanan in ungkú mosia in noḻibut kon inakó, nonurak kon ḻima bo sioḷku.

¹⁸ Bayongan in tuḷanku koiapanku, Musung in inimindoi kon inakó naonda bo tontonan.

¹⁹ Mosia in nosilai kon pakeangku, bo nopogonik in undi sin mogamá kon jubahku.

²⁰ Táe Iko, dikabí yumayú, o Tuhan, ḷagidon angoi bo tuḷungai in akuoi, sin Ikobí in ropotku.

²¹ Posídon in nyawaku kon kedang, posaḷamatdon in akuoi nongkon ungkú mita inta moranut.

²² Akuoi in diádon mokopongonu, poḷuatdon in akuoi nongkon tungoi in bantong bo nongkon tunggi in singa.

²³ Aid-Mu in oumanonkubí kon i utatku mita; kon bonu in poyodungkuḷan in umat-Mu akuoi in modayow kon ini-Mu.

²⁴ Dayowdon in sia, ei intau mita inta mopirisaya! Pomuliadon in Sia, bayongan bui i Yakub! Tonsiupdon kon i-Nia, bayongan in buí in Israel!

²⁵ Sin diábí pinoompá-Neamai in intau inta dinorot, bo diábí nopokooyámai kon roriganea. Sia in diábí nonoḻikud kon intau tatua, táe noibogbí nokidongog aka sia mopoigum in totuḷung kon i-Nia.

²⁶ Kon yuak in poyodungkuḷan in umat akuoi in modayow kon ini-Mu, sin bayongan in inta ain inaidan-Mu. Kon tayowon in umat inta mopirisaya posumbaku in kuruban inta pinodandiku.

²⁷ Inta nobiag nobogá in mongaanbí modapot in mobotug; intau inta mamangoi kon i Tuhan in modayowbí kon i-Nia. Igumon mako moiko in umuran mobiag motompia modapot in mononoi!

²⁸ Bayongan in bangusa in mokotoropbí kon i Tuhan bo mobuibí mangoi kon i-Nia, bayongan in suku bangusa in tumonsiupbí mosumba kon i-Nia.

²⁹ Sin ki Tuhanbí inta kitogi kawasa, Sia in nomarenta kon bangusa mita.

³⁰ Bayongan in intau moḷoben in tumungkudbí kon tayowon-Nea, bayongan in intau mato-matoi in tumonsiupbí mosumba kon i-Nia.

³¹ Bui mita moiduduimai in mosumbabí kon i Tuhan, Sia in umuranbí popotaau kon bayongan in adí bo ompu.

³² Kon bangusa inta moiḷontang moiduduimai in popotaauanbí kon ki Tuhan in noposaḷamatdon kon umat-Nea.