MAZMUR 21 - Alkitab Singog In Mongondow Masa In Tanaa

Dondong sukur sin ki datu in nountung

¹ Kon i itoi in mododondong. Mazmur i Daud.

² O Tuhan, moḷunganga in gina i datu sin iniropotan-Mudon in sia; mopia in ginanea popisí in kinountungan inta inogoi-Mu kon inia!

³ Dinuduian-Mu in onu inta kinoibog in ginanea, bo nobogoi kon onu inta inigumnea.

⁴ Iko in namangoi kon inia kodia-dia in barakat inta mobarong totok, bo nopoḷutud in mahkota buḷawan kon uḷunea.

⁵ Sia in nopoigum in kobiagan, bo inogoi-Mu doman kon inia, nodapot in umur moḷanggó modapot in mononoi.

⁶ Popisí in totuḷung-Mu dá nobaḻí in sia totok in ihoromat, binaḻí-Mu in sia ponango-nangoian bo motarimbuka mako.

⁷ Binarakatan-Mu in sia modapot in mononoi; kinoangoian-Mu nokosanang totok kon inia.

⁸ Ki datu in umuran nongamang kon i Tuhan Inta Totok in moḷantud, sia in umuranbí moaman sin umuran kinotabi i Tuhan.

⁹ Sia in modakopbí kon bayongan in musungnea, bo nodomok kon bayongan in intau inta nondoí kon i-Nia.

¹⁰ Sia in namangoi naonda bo tuḷú inta kodoko-dokot sin moyopú kon i monia. Mosia in yopúonbí in torú i Tuhan, bo pagongon in tuḷú.

¹¹ Nongkon buí monia diá in kinotaḻiban, ki datu in moyompatbí kon i monia komintan.

¹² Aka mosia bo monomayá kon monayow kon i datu, tombuḻitok monia in diábí mokodapot.

¹³ Popopiot-Neabí in mata in piot-Nea, dá momurow in mosia bo moḷagui.

¹⁴ Kami in modayow kon ini-Mu Tuhan, sin moḷobenbí totok in kawasa-Mu, kami in modondong modayow kon kotorindog-Mu.