MAZMUR 20 - Alkitab Singog In Mongondow Masa In Tanaa

Sambayang mopoigum sinbá pountungon

¹ Kon i itoi in mododondong. Mazmur i Daud.

² Igumon mako ki Tuhan in motubag kon inimu kon dodai in koantugan in roriga, igumon mako kawasa i Allah i Yakub moḷukad kon inimu!

³ Igumon mako potabá-Nea mangoi in mototuḷung nongkon Baḷoi-Nea, bo motuḷung nongkon Tombuḷud in Sion.

⁴ Igum mako kotoropan-Nea in bayongan inta pinosumbamu, bo moibog kon bayongan in kuruban payongonmu.

⁵ Igumon mako ogoi-Nea in bayongan inta kinoibogmu, bo mopomia sinbá bayongan in tomayámu kodapotan.

⁶ Dá kami in morogiow takin pia in gina sin iko in nountung, bo motonggó kon bandera mita sin modayow kon i Allah naton. Igumon mako ki Tuhan in mobogoi kon bayongan inta pinoigummu.

⁷ Tanaa in kinotaauanku kon ki Tuhan in mopountung kon i datu inta piniḻí-Nea. Ki Tuhan in notubag kon inia nongkon soroga inta motusi; pinodoyon kon kawasa i Tuhan pountungon totok.

⁸ Oyúon in intau inta mopongata in kereta in parangnea, oyúon doman in mopongata in kabaḷonea. Táe kita in mopongata in kawasa in Tuhan, ki Allah naton.

⁹ Mosia in moipintudbí bo moḷabú, táe kita in mobuatbí bo simindog moroton.

¹⁰ Oo Tuhan, popountungpa kaasí in ki datu, tubagaidon in kami kon tungkuḷ in kami mokuani.