MAZMUR 2 - Alkitab Singog In Mongondow Masa In Tanaa

Datu inta piniḻí i Allah

¹ Nongonu sin bangusa mita in momiabí kon ropatoi bo suku mita in bangusa monomayábí kon inta diá in mangaḻenea?

² Datu mita in dunia simindog moyododai bo inta mongogawasa mita moyopakat moḷawang kon i Tuhan bo datu inta piniḻí-Nea.

³ Mongongawasa mita tatua in moguman, “Igai bá putoḷon naton in kawasa monia bo mogagow kon kabebasan naton!”

⁴ Nongkon ḷoḻitúan pomomarentaan-Nea kon soroga ki Tuhan kinomosing bo moningkuḻe kon tomayá monia.

⁵ Bo mosia in sinorúan-Nea, bo sinaḻikokogan in torú-Nea.

⁶ Kai-Nia, “Kon Sion buḷud-Ku inta motusi aindon dinuí-Ku datu inta piniḻí-Ku.”

⁷ Guman i datu, “Akuoi in moibog mopotaau in onu inta ain sinantú i Tuhan. Guman-Nea kon inakó, ‘Iko in ki adí-Ku ḷoḷaki, singgai in naa Akuoi in nobaḻí ki Amámu.

⁸ Igumdon, dá bayongan in bangusa ogoi-Kubí kon inimu, bo sinangkub in dunia baḻíon-Kudon kapunyaanmu.

⁹ Mosia in putoḷonmubí in tungkud uatoi bo ḷosionmu naonda bo kuyon butá.’ ”

¹⁰ Dá taridiai, ei datu mita, tano-tanobka, ei mongongawasa mita kon dunia!

¹¹ Pogundoidon kon i Tuhan takin mopirisaya,

¹² Tungkudon kon tayowon-Nea takin urot, dika modapot in ki Tuhan tumorú bo moiko in baḷunea putúan, sin torú-Nea baḷúdon modokot. Pia in kamang in intau inta moniung kon i Tuhan!